ന്യൂഡല്ഹി; വടക്കുകിഴക്കന് സംസ്ഥാനങ്ങളില് ന്യൂനപക്ഷങ്ങള് ബിജെപിയെ ഭയക്കുന്നില്ലന്ന്് പ്രധാനമന്ത്രി നരേന്ദ്രമോദി. നാഗാലാന്ഡിലും മേഘാലയയിലും ക്രിസ്ത്യന് സഹോദരങ്ങള് ബിജെപിക്കൊപ്പം നിന്നു. ഡല്ഹിയും വടക്കുകിഴക്കന് സംസ്ഥാനങ്ങളുമായുള്ള അകലം കുറയുന്നുവെന്നും പ്രധാനമന്ത്രി പറഞ്ഞു.
മേഘാലയയിലും നാഗാലാന്ഡിലും ബിജെപി സര്ക്കാരുണ്ടാക്കിയതുപോലെ കേരളത്തിലും സര്ക്കാരുണ്ടാക്കുമെന്നും അദ്ദേഹം പറഞ്ഞു. സംസ്ഥാനത്ത് ഗുസ്തി, ഒരിടത്ത് ദോസ്തി എന്ന നിലപാട് കേരളത്തിലെ ജനങ്ങള് കാണുന്നുണ്ടെന്നും മോദി പറഞ്ഞു
ദില്ലിയും വടക്കുകിഴക്കന് സംസ്ഥാനങ്ങളും തമ്മില് പാലം പണിയാനായി, ജനങ്ങള്ക്ക് ജനാധിപത്യത്തിലുള്ള വിശ്വാസം വ്യക്തമാക്കുന്നതാണ് തെരഞ്ഞെടുപ്പ് ഫലമെന്ന് പ്രധാനമന്ത്രി പറഞ്ഞു. ഇത് മാറ്റത്തിന്റെ സമയമാണെന്ന് പറഞ്ഞ മോദി, ബിജെപിയെ തെരഞ്ഞെടുത്ത എല്ലാവര്ക്കും നന്ദിയും അറിയിച്ചു.
‘പുതിയ ചരിത്രം സൃഷ്ടിക്കേണ്ട സമയമാണിത്. ഇനി വടക്കുകിഴക്കന് മേഖലയുടെ സമാധാനം, സമൃദ്ധി, വികസനം എന്നിവയുടെ കാലമാണ്. അടുത്തിടെ ഞാന് വടക്കുകിഴക്കന് പ്രദേശങ്ങള് സന്ദര്ശിച്ചപ്പോള് ഒരാള് എന്നെ അര്ധ സെഞ്ചറിക്ക് അഭിനന്ദിച്ചു. കാര്യമന്വേഷിച്ചപ്പോഴാണ് അറിഞ്ഞത്, ഞാന് 50 തവണ ഈ പ്രദേശങ്ങള് സന്ദര്ശിച്ചുവെന്ന്.’– മോദി പറഞ്ഞു.
‘സ്ത്രീ ശാക്തീകരണത്തിന് ഞങ്ങള് പ്രതിജ്ഞാബദ്ധരാണ്. മുന്നിര പദ്ധതികളിലൂടെ വടക്കുകിഴക്കന് മേഖലയില് ഞങ്ങളത് ഉറപ്പാക്കി. ത്രിപുര, നാഗാലാന്ഡ്, മേഘാലയ എന്നിവിടങ്ങളിലെ ജനങ്ങള്ക്ക് നന്ദി അറിയിക്കുന്നു. ഒപ്പം മൂന്നു സംസ്ഥാനങ്ങളിലെയും ബിജെപി പ്രവര്ത്തകരെ അഭിനന്ദിക്കുന്നു. വടക്കുകിഴക്കന് മേഖലയില് പ്രവര്ത്തനം അത്ര എളുപ്പമല്ല, അതിനാല് അവര്ക്ക് പ്രത്യേക നന്ദിയും പറയുന്നു.’ പ്രധാനമന്ത്രി പറഞ്ഞു.
