കോട്ടയം: ഒന്നാം വര്‍ഷ വിദ്യാര്‍ഥികളെ റാഗ് ചെയ്ത കേസില്‍ നാട്ടകം പോളിടെക്നിക്കിലെ സീനിയര്‍ വിദ്യാര്‍ഥികളായ ഒന്‍പത് പേര്‍ക്ക് തടവ് ശിക്ഷ. അഭിലാഷ് ബാബു, എസ് മനു, റെയ്സണ്‍, ജെറിന്‍ കെ പൗലോസ്, കെ എം ശരണ്‍, പ്രവീണ്‍, ജയപ്രകാശ്, പി നിഥിന്‍, കെ ശരത് ജോ എന്നിവരെ രണ്ട് വര്‍ഷം വീതം തടവിനു ശിക്ഷിച്ചു. പ്രതികള്‍ 12,000 രൂപ വീതം പിഴയൊടുക്കാനും ഉത്തരവുണ്ട്. പിഴ അടച്ചില്ലെങ്കില്‍ അഞ്ച് മാസം അധിക തടവ് അനുഭവിക്കേണ്ടിവരും.
കോടതി നി‍ർദേശിച്ച പിഴയായ തുകയിൽ നിന്നും 50,000 രൂപ റാഗിങ്ങിനെ തുട‍ർന്ന് പരുക്കേറ്റ ഇരിങ്ങാലക്കുട സ്വദേശി അവിനാഷ് എന്ന വിദ്യാർത്ഥിക്ക് നൽകാൻ നി‍ർദേശിച്ചിട്ടുണ്ട്. പരുക്കേറ്റതിനെ തുട‍ർന്ന് ചികിത്സയിലായിരുന്നു അവിനാഷ്. പരിശോധനകളിൽ വിദ്യാർത്ഥിയുടെ വൃക്ക തകരാറിലായതായി കണ്ടെത്തി. നീണ്ട കാലത്തെ ചികിത്സ വേണ്ടി വന്നിരുന്നു. തുട‍ർന്നാണ് വിദ്യാർത്ഥിക്ക് പിഴ തുകയിൽ നിന്ന് ഒരു ഭാഗം നൽകാൻ കോടതി നി‍ദേശിച്ചത്.
2016 ഡിസംബര്‍ 2നാണ് റാഗിങ് നടന്നത്. ജൂനിയര്‍ വിദ്യാര്‍ഥികളെ വീട്ടില്‍ പോകാന്‍ അനുവദിക്കാതെ കോളേജ് ഹോസ്റ്റലിൽ നഗ്നരാക്കി നിര്‍ത്തി വെള്ളമില്ലാത്ത തറയില്‍ നീന്തിച്ചെന്നും ഒറ്റക്കാലില്‍ നിര്‍ത്തിയെന്നുമായിരുന്നു പരാതി. അലമാരയ്‌ക്കുള്ളില്‍ കയറ്റിയിരുത്തി പാട്ടുപാടിച്ചു, നിര്‍ബന്ധിച്ച്‌ മദ്യം കുടിപ്പിച്ചു, തലയില്‍ വെള്ളം കോരി ഒഴിച്ചു എന്നിങ്ങനെയായിരുന്നു ആരോപണങ്ങള്‍.
പ്രതികരിക്കാൻ ഇവിടെ എഴുതുക: