തിരുവനന്തപുരം: ദുരൂഹ സാഹചര്യത്തില് യുവതിയെ മരിച്ച നിലയില് കണ്ടെത്തിയ സംഭവത്തില് ഭര്ത്താവ് കീഴടങ്ങി. ഇയാളെ കേന്ദ്രീകരിച്ച് അന്വേഷണം തുടരുന്നതിനിടെയാണ് ഇന്ന് രാവിലെ വിഴിഞ്ഞം പൊലീസ് സ്റ്റേഷനില് കീഴടങ്ങിയത്. വിഴിഞ്ഞം കോട്ടപ്പുറം കരിമ്പള്ളിക്കര ദില്ഷന് ഹൗസില് പ്രിന്സി(32)യെയാണ് വീടിനുള്ളിലെ കട്ടിലില് മരിച്ച നിലയില് കണ്ടെത്തിയത്.
പ്രിന്സിയെ ഭർത്താവ് അന്തോണിദാസ് (രതീഷ്,36) കഴുത്തു ഞെരിച്ചു കൊലപ്പെടുത്തുകയായിരുന്നു എന്ന് പിന്നീട് വ്യക്തമായിരുന്നു. ശനിയാഴ്ച രാത്രി ഒമ്പതോടെയാണ് പ്രന്സി കൊല്ലപ്പെട്ടത്. കുടുംബ പ്രശ്നത്തെ തുടര്ന്ന് കഴിഞ്ഞ ഒരു മാസമായി ഇരുവരും അകന്ന് താമസിക്കുകയായിരുന്നു. പ്രിന്സിയും മക്കളായ ദില്ഷനും ദിഷാലും ദിഹാനയും സഹോദരിയുടെ വീട്ടിലായിരുന്നു.
ശനിയാഴ്ച രാത്രി അന്തോണിദാസ് ഇവിടെയെത്തി പ്രശ്നങ്ങള് ഒത്തുതീര്പ്പാക്കിയശേഷം എട്ടോടെ പ്രിന്സിയെയും മക്കളെയും വീട്ടിലേക്ക് കൂട്ടി കൊണ്ടുപോയി. തുടര്ന്ന് വീട്ടിലെത്തിയ ശേഷം ഇയാള് മക്കളെ കളിക്കാന് വിട്ടു. ഇവര് തിരികെയെത്തിയപ്പോള് അമ്മ ഉറങ്ങിക്കിടക്കുകയാണെന്ന് പറഞ്ഞ അന്തോണിദാസ് പുറത്തേക്ക് പോകുകയും ചെയ്തു.
കുട്ടികള് വന്ന് നോക്കുമ്പോള് പ്രിന്സി ചലനമില്ലാതെ കിടക്കുകയയായിരുന്നു. ഇവര് നിലവിളിച്ചതിനെ തുടര്ന്ന് അയല്വാസികളെത്തി പ്രിന്സിയെ വിഴിഞ്ഞം സാമൂഹ്യാരോഗ്യ കേന്ദ്രത്തിലെത്തിക്കുകയായിരുന്നു. കഴുത്തിലെ പാട് കണ്ട ആശുപത്രി അധികൃതര് പോലീസിനെ വിവരമറിയിക്കുകയായിരുന്നു. തുടര്ന്ന് വിഴിഞ്ഞം എസ്.എച്ച്.ഒ പ്രജീഷ് ശശിയുടെ നേതൃത്വത്തിലുള്ള സംഘം സ്ഥലത്തെത്തി മൃതദേഹം മെഡിക്കല് കോളജില് എത്തിച്ച് പോസ്റ്റുമോര്ട്ടത്തിനുശേഷം ബന്ധുക്കള്ക്ക് വിട്ടു നല്കി.
