ചെന്നൈ: ഐസ്ക്രീം കഴിച്ചതിന് പിന്നാലെ ഛര്ദ്ദിച്ച് അവശയായ കുട്ടികളെ ആശുപത്രിയില് പ്രവേശിപ്പിച്ചു. ഐസ്ക്രീമില് തവള ഉണ്ടായിരുന്നെന്ന് രക്ഷിതാക്കള് ആരോപിച്ചു. മാതാപിതാക്കളുടെ പരാതിയില് പോലീസ് കേസെടുത്തു.
കോവളന് നഗറില് താമസിക്കുന്ന അന്പുസെല്വത്തിന്റെയും ജാനകിശ്രീയുടെയും മക്കളായ മിതശ്രീ (എട്ട്), രക്ഷണശ്രീ (ഏഴ്), ധരണി (നാല്) എന്നിവരെയാണ് ആശുപത്രിയില് പ്രവേശിപ്പിച്ചത്. കേസില് കടയുടമ ദുരൈരാജി (60)യെ പോലീസ് അറസ്റ്റ് ചെയ്തു. ഞായറാഴ്ചയായിരുന്നു സംഭവം.
തൈപ്പൂയ്യ ഉത്സവത്തോടനുബന്ധിച്ച് മുരുകന് ക്ഷേത്രത്തിലെത്തിയതായിരുന്നു ജാനകിശ്രീയും മക്കളും. ഇതിനിടയില് ദുരൈരാജിയുടെ കടയില് നിന്ന് മക്കള്ക്ക് ഐസ്ക്രീം വാങ്ങിക്കൊടുത്തു. ഇതു കുറച്ച് കഴിച്ചയുടന് കുട്ടികള് ഛര്ദിക്കാന് തുടങ്ങി. തുടര്ന്ന് ഐസ്ക്രീം പരിശോധിച്ചപ്പോഴാണ് തവള ചത്തുകിടക്കുന്നത് കണ്ടത്.
