തിരുവനന്തപുരം: വിലക്കേര്‍പ്പെടുത്തുന്ന സാഹിത്യത്തമ്പുരാക്കന്മാര്‍ക്ക് മറുപടിയുമായി സംവിധായകനും ചലച്ചിത്ര നിരൂപകനുമായ വിജയകൃഷ്ണന്‍. കേരള ഹിന്ദൂസ് ഓഫ് നോര്‍ത്ത് അമേരിക്ക് തിരുവനന്തപുരത്ത് നടത്തിയ ഹിന്ദു കോണ്‍്കളേവി പങ്കെടുക്കുന്നവരുടെ സാഹിത്യസൃഷ്ടികളെ റദ്ദു ചെയ്യണമെന്ന സച്ചിദാനന്ദന്‍, ചരുവില്‍ അശോകന്‍ എന്നിവരുടെ പ്രസ്താവനയോട് പ്രതികരിക്കുകയായിരുന്നു അദ്ദേഹം .
ആര്‍ എസ് എസിനു മേലുളള നിരോധനം നീക്കണമെന്ന് ആവശ്യപ്പെട്ട് കേന്ദ്രത്തിന് കത്തയച്ച സുഗതകുമാരിയും വിഷ്ണുനാരായണന്‍ നമ്പൂതിരിയും ഭരത് ഗോപിയേയും റദ്ദ് ചെയ്തവരെ കാലം റദ്ദ് ചെയ്യത് ഒര്‍ക്കണമെന്നും വിജയകൃഷ്ണന്‍ ഫേസ് ബുക്കില്‍ കുറിച്ചു
കുറിപ്പിന്റെ പൂര്‍ണ്ണരൂപം
ഹിന്ദു കോണ്‍ക്ലേവില്‍ പങ്കെടുക്കുന്ന സാഹിത്യകാരന്മാര്‍ക്ക് വിലക്കേര്‍പ്പെടുത്തണമെന്ന് സച്ചിദാനന്ദന്റെ ആഹ്വാനം.അമേരിക്കയിലെ ഒരു മലയാളിസംഘടന ഏര്‍പ്പാട് ചെയ്ത സമ്മേളനമാണിത്.അതിനെന്താണ് അയിത്തമെന്ന് എനിക്ക് മനസ്സിലാവുന്നില്ല,മറ്റു മതസംഘടനകള്‍ നടത്തുന്ന സമാനസമ്മേളനങ്ങളില്‍ മാര്‍ക്‌സിസ്‌ററ് മന്ത്രിമാരും ബുദ്ധിജീവികളുമൊക്കെ അഹമഹമികയാ പങ്കെടുക്കുന്നത് കണ്ടിട്ടുണ്ട്.പോയ വര്‍ഷം ഈ സംഘടനയുടെ അവാര്‍ഡ് നിശ്ചയിച്ച ജൂറിയിലെ അംഗമായിരുന്നു പ്രഭാവര്‍മ്മയെന്ന് കേട്ടു.ഇത്തരം ഫത്വകളെപ്പറ്റി മുന്‍കൂട്ടി അറിഞ്ഞതുകൊണ്ടാവുമോ പ്രഭാവര്‍മ്മ ഒഴിഞ്ഞുമാറിയത്?ഫത്വ പുറപ്പെടുവിച്ച സച്ചിദാനന്ദനാകട്ടെ,മതതീവ്രവാദസംഘടനകളുടെ സമ്മേളനങ്ങളില്‍ സ്ഥിരം ക്ഷണിതാവാണെന്നുമാത്രമല്ല,അത്തരം സംഘടനകള്‍ സ്‌പോണ്‍സര്‍ ചെയ്ത അനേകം ക്യാഷ് അവാര്‍ഡുകള്‍ ഗള്‍ഫ് നാടുകളില്‍ പറന്നുനടന്ന് വാങ്ങിയ ആളാണെന്നും പാണന്മാര്‍ പാടുന്നത് ഞാനും കേട്ടിട്ടുണ്ട്.നരേന്ദ്രമോദി അധികാരത്തില്‍ വന്നപ്പോള്‍ സച്ചിദാനന്ദന്റെ ആഹ്വാനം ചെവിക്കൊണ്ട് പഴയകാല അവാര്‍ഡ് ജേതാക്കള്‍ തങ്ങള്‍ക്കു കിട്ടിയ പണമൊഴികെയുള്ള സാധനസാമഗ്രികള്‍ സാഹിത്യ അക്കാദമി ആസ്ഥാനത്തുകൊണ്ടുപോയി വലിച്ചെറിഞ്ഞെന്നും കേട്ടിട്ടുണ്ട്.അവാര്‍ഡ് വാപ്പസി എന്ന നാമത്തിലാണ് ഈ സംഭവം ചരിത്രത്തില്‍ രേഖപ്പെടുത്തിയിട്ടുള്ളത്.എന്നാല്‍,മോദി അധികാരത്തിലിരിക്കുമ്പോള്‍ ഈ അവാര്‍ഡുകള്‍ മിക്കതും ലഭിച്ചത് പ്രഭാവര്‍മ്മ, കെ.ആര്‍.മീര തുടങ്ങിയ അറിയപ്പെടുന്ന മാര്‍ക്‌സിസ്റ്റ് എഴുത്തുകാര്‍ക്കാണ്.അവരെല്ലാം ദല്‍ഹിയില്‍ പോയി അവാര്‍ഡ് ഏറ്റുവാങ്ങിയിട്ടുമുണ്ട്.മോദി പ്രധാനമന്ത്രിപദം സ്വപ്നം കാണുന്നതിനും മുന്‍പേ അവാര്‍ഡ് കിട്ടിയവര്‍ മോദി അധികാരത്തില്‍ വന്നതില്‍ പ്രതിഷേധിച്ച് അവാര്‍ഡുകള്‍ മടക്കുന്നു! മോദി അധികാരത്തിലിരിക്കുമ്പോള്‍ കിട്ടുന്ന അവാര്‍ഡുകള്‍ രണ്ടു കൈയും നീട്ടി സ്വീകരിക്കുന്നു!എന്നെപ്പോലുള്ള സാധാരണക്കാര്‍ക്ക് മനസ്സിലാക്കാന്‍ പ്രയാസമായ വൈരുദ്ധ്യാത്മക ഭൗതികവാദം !
ഇന്നെല്ലാവരും മറന്നുകഴിഞ്ഞ ഒരു കാര്യം ഞാനോര്‍മ്മിപ്പിക്കട്ടെ.പണ്ട് ആര്‍.എസ.എസിനെ നിരോധിച്ച കാലത്ത് ആ നിരോധനം നീക്കണമെന്ന് ആവശ്യപ്പെട്ട് കേരളത്തിലെ കുറേ പ്രമുഖവ്യക്തികള്‍ കേന്ദ്രത്തിന് കത്തയയ്‌ക്കുകയുണ്ടായി.അവരുടെ കൂട്ടത്തില്‍ സുഗതകുമാരിയും വിഷ്ണുനാരായണന്‍ നമ്പൂതിരിയും ഭരത് ഗോപിയുമുണ്ടായിരുന്നു.ഇതേത്തുടര്‍ന്ന് ഈ മൂന്നുപേരെയും അവരുടെ ഇത:പര്യന്തമുള്ള കലാസൃഷ്ടികളെയും റദ്ദ് ചെയ്തിരിക്കുന്നതായി മലയാളത്തിലെ കുറേ സാഹിത്യകാരന്മാരും ബുദ്ധിജീവികളും പ്രസ്താവനയിറക്കി.ഇങ്ങനെ റദ്ദ് ചെയ്യപ്പെട്ടുവെങ്കിലും തങ്ങളുടെ കലാപ്രവര്‍ത്തനവും സാമൂഹ്യസേവനവും പൂര്‍വാധികം ഊര്‍ജ്ജസ്വലതയോടെ റദ്ദ് ചെയ്യപ്പെട്ടവര്‍ തുടര്‍ന്നുപോന്നു.മണ്‍മറഞ്ഞുപോയെങ്കിലും അവര്‍ മൂവരും ഇന്നും മലയാളത്തില്‍ നക്ഷത്രതേജസ്സോടെ ജീവിക്കുന്നു.അവരെ റദ്ദ് ചെയ്തവരെയാകട്ടെ കാലം റദ്ദ് ചെയ്യുകയുമുണ്ടായി..ആരുടെയോ ഗുഡ്ബുക്കില്‍ സ്ഥാനം പിടിക്കാന്‍ അഭ്യാസപ്രകടനങ്ങള്‍ നടത്തുന്ന മഹാഭാഗ്യവാന്മാരായ സച്ചിദാനന്ദന്മാരും ചരുവില്‍മാരും ഇതോര്‍ത്താല്‍ നന്ന്.
പ്രതികരിക്കാൻ ഇവിടെ എഴുതുക: