ആലപ്പുഴ: ആഭ്യന്തര വകുപ്പ് അഡീഷണല് ചീഫ് സെക്രട്ടറി ഡോ. വി.വേണുവും ഭാര്യയും തദ്ദേശ വകുപ്പ് അഡീഷണല് ചീഫ് സെക്രട്ടറിയുമായി ശാരദ മുരളീധരനും കുടുംബവും സഞ്ചരിച്ച ഔദ്യോഗിക വാഹനം അപകടത്തില്പെട്ടു. ആലപ്പുഴ കായംകുളത്ത് കാര് ലോറിയുമായി കൂട്ടിയിടിച്ചാണ് അപകടം. അപകടത്തില് ഏഴു പേര്ക്ക് പരിക്കേറ്റു. കൊച്ചിയില് നിന്ന് തിരുവനന്തപുരത്തേക്ക് പോകുകയായിരുന്നു വേണുവും കുടുംബവും. കൊറ്റംകുളങ്ങരക്ക് സമീപം എറണാകുളം ഭാഗത്തേക്ക് വരികയായിരുന്ന ലോറിയുമായി കാര് കൂട്ടിയിടിക്കുകയായിരുന്നു.
വേണു, ഭാര്യ ശാരദാ മുരളീധരന്, മകന് ശബരി, ഡ്രൈവര് അഭിലാഷ്, കുടുംബ സുഹൃത്തുക്കളായ പ്രണവ്, സൗരവ് എന്നിവര്ക്കാണ് പരിക്കേറ്റത്. അടുത്ത കാലത്താണ് ആഭ്യന്തര വകുപ്പിന്റെ ചുമതല വേണുവിന് സര്ക്കാര് നല്കിയത്.അപകടത്തില് വേണുവിന്റെ മൂക്കിനും വയറിനും പരിക്കേറ്റിട്ടുണ്ട്. ആന്തരിക രക്തസ്രാവമുണ്ട്. പരുമല ആശുപത്രയിലെ തീവ്രപരിചരണ വിഭാഗത്തിലാണ് ഇപ്പോള് വേണു. കാറിലുണ്ടായിരുന്ന എല്ലാവര്ക്കും പരിക്കേറ്റെങ്കിലും മറ്റാര്ക്കും കാര്യമായ പരിക്കില്ല. ഇടിയുടെ ആഘാതത്തില് കാറിന്റെ മുന്ഭാഗം പൂര്ണമായി തകര്ന്നിട്ടുണ്ട്. വേണുവിന്റെ ആരോഗ്യനില തൃപ്തികരമെന്നാണ് ആശുപത്രി വൃത്തങ്ങള് പറയുന്നത്.
