കൊച്ചി: വി.എസ്. അച്യുതാനന്ദന്‍ വെറുക്കപ്പെട്ടവര്‍ എന്ന് വിളിച്ച പ്രമുഖ വ്യവസായി ഫാരിസ് അബൂബക്കറിന്റെ വീട്ടില്‍ മുഖ്യമന്ത്രി സന്ദര്‍ശനം നടത്തിയെന്ന് ആരോപിച്ച് പി.സി. ജോര്‍ജ്ജ്. പിണറായി വിജയന്റെ ദുരൂഹമായ അവിഹിത ബന്ധങ്ങളില്‍ ഒന്നാണ് ഫാരിസ് അബൂബക്കര്‍. ഞാന്‍ പറഞ്ഞതെല്ലാം ഇപ്പോള്‍ സത്യമാണെന്ന് തെളിഞ്ഞില്ലേ – പി.സി. ജോര്‍ജ്ജ് ചോദിച്ചു.
ഇരുവരും തമ്മിലുള്ള ബന്ധത്തിന് തെളിവുണ്ടോ എന്നാണ് പലരും ചോദിച്ചത്. ഇപ്പോള്‍ വീഡിയോ സഹിതമാണ് ഈ ബന്ധം പുറത്തുവന്നത്. – പി.സി. ജോര്‍ജ്ജ് പറഞ്ഞു. മൂന്നുമണിക്കൂറോളം കൊയിലാണ്ടി നന്തിയിലെ ഫാരിസ് അബൂബക്കറിന്റെ വീട്ടില്‍ പിണറായി ചെലവഴിച്ചു. എന്താണ് ഇത്രയും നേരം സംസാരിക്കാനുള്ളത്. മുഖ്യമന്ത്രി മരണവീട്ടില്‍ പോകുന്നതില്‍ തെറ്റില്ല. പക്ഷെ ഇത്രയും നേരം അവിടെ ചെലവഴിക്കണമെങ്കില്‍ അതിന് പിന്നിലെ ബന്ധം ചെറുതല്ല. മുഖ്യമന്ത്രി വിദേശത്ത് പോകുമ്പോള്‍ എപ്പോഴും രണ്ടുപേര്‍ കൂടെയുണ്ടാകും. ഒന്ന് മകള്‍ വീണയും മറ്റൊന്ന് ഫാരിസ് അബൂബക്കറാണ്. ഇക്കാര്യങ്ങള്‍ ചൂണ്ടിക്കാണിച്ചപ്പോള്‍ ആരും വിശ്വസിച്ചില്ല. ഇപ്പോള്‍ എല്ലാവര്‍ക്കും കാര്യം മനസ്സിലായി.– പി.സി. ജോര്‍ജ്ജ് ആരോപിച്ചു..
പോപ്ലുലര്‍ ഫ്രണ്ടുമായി ബന്ധമുള്ള ഫാരിസ് അബൂബക്കറുമായി മുഖ്യമന്ത്രി മൂന്ന് മണിക്കൂറിലേറെ ചര്‍ച്ച ചെയ്തത് എന്താണെന്ന് പറയണം. അല്ലെങ്കില്‍ സിബിഐയും ഇഡിയും ഇക്കാര്യം അന്വേഷിക്കണം.- പി.സി. ജോര്‍ജ്ജ് പറഞ്ഞു.
പ്രതികരിക്കാൻ ഇവിടെ എഴുതുക: