കണ്ണൂര് : ലോകകപ്പ് ഫൈനലില് അര്ജന്റീന കപ്പ് നേടിയതിനെ തുടര്ന്നുണ്ടായ ആഹ്ലാദ പ്രകടനം സംഘര്ഷത്തിലേക്ക് നീങ്ങി മൂന്ന് പേര്ക്ക് വെട്ടേറ്റു. കണ്ണൂര് പള്ളിയാന്മൂലയിലാണ് ആഹ്ലാദ പ്രകടനത്തിനിടെ സംഘര്ഷമുണ്ടായത്. പരിക്കേറ്റതില് ഒരാളുടെ നില ഗുരുതരമാണ്.
തിങ്കളാഴ്ച പുലര്ച്ചെ 12.40 ഓടെയായിരുന്നു സംഭവം. അര്ജന്റീന പെനാള്ട്ടിയില് ജയിച്ചതോടെ ഫ്രാന്സ് അര്ജന്റീന ആരാധകര് തമ്മില് വാക്കുതര്ക്കം ഉണ്ടാവുകയും ഇത് സംഘര്ഷത്തിലേക്ക് നീങ്ങുകയുമായിരുന്നു. ഫ്രാന്സ് ആരാധകരെ ഒരുസംഘം കളിയാക്കുകയതോടെയാണ് പ്രശ്നങ്ങള്ക്ക് തുടക്കമായത്.
അനുരാഗ്, ആദര്ശ്, അലക്സ് ആന്റണി എന്നിവര്ക്കാണ് പരിക്കേറ്റത്. ഇതില് അനുരാഗിന്റെ നിലയാണ് ഗുരുതരം. ഉടന്തന്നെ പോലീസ് എത്തി പരിക്കേറ്റവരെ ആശുപത്രിയില് എത്തിച്ചു. സംഭവവുമായി ബന്ധപ്പെട്ട് ആറുപേരെ പോലീസ് കസ്റ്റഡിയില് എടുത്തിട്ടുണ്ട്. പരിക്കേറ്റ മൂന്നുപേരെയും രണ്ട് സ്വകാര്യ ആശുപത്രികളിലാണ് പ്രവേശിപ്പിച്ചിരിക്കുന്നത്.
നേരത്തെ ലോകകപ്പ് മത്സരത്തില് ബ്രസീല് തോറ്റപ്പോഴും ഇതേ സ്ഥലത്ത് സംഘര്ഷമുണ്ടായിരുന്നു. എന്നാല് ആര്ക്കും പരിക്കുണ്ടായിരുന്നില്ല. അതേസമയം ഇവര് ലഹരി ഉപയോഗിച്ചിരുന്നോ എന്ന കാര്യം പോലീസ് അന്വേഷിക്കുന്നുണ്ട്.
