കണ്ണൂർ: ആയിക്കരയിൽ പ്രായപൂർത്തിയാകാത്ത ആൺകുട്ടിയെ ലഹരി നൽകി പീഡിപ്പിച്ചു. 15 കാരനായ ആൺകുട്ടിയ്ക്കാണ് ദുരനുഭവം ഉണ്ടായത്. സംഭവത്തിൽ പ്രതിയായ കണ്ണൂർ സിറ്റി സ്വദേശി ഷെരീഫിനെ പോലീസ് കസ്റ്റഡിയിൽ എടുത്തു. ആയിക്കരയിലെ ആളൊഴിഞ്ഞ കെട്ടിടത്തിൽ എത്തിച്ചാണ് ഒൻപതാം ക്ലാസ് വിദ്യാർത്ഥിയെ പീഡിപ്പിച്ചത്. ഇയാളുടെ കൂടെ ഉണ്ടായിരുന്ന റഷാദിനായി പോലീസ് തെരച്ചിൽ ശക്തമാക്കിയിട്ടുണ്ട്.
കുട്ടിയുടെ സഹായത്തോടെ തന്നെയാണ് പോലീസ് ഷെരീഫിനെ പിടികൂടിയത്. കുട്ടി പറഞ്ഞത് പ്രകാരം ആളൊഴിഞ്ഞ വീട്ടിൽ എത്തിയ ഷെരീഫിനെ വീടിന്റെ വാതിൽ ചവിട്ടി തുറന്നാണ് പിടികൂടിയത്. കുട്ടിയുടെ അയൽവാസിയാണ് റഷാദ്. ഇയാളാണ് കുട്ടിയെ ലഹരി സംഘത്തിന്റെ വലയിലാക്കിയത്. കൊറോണ കാലത്ത് ഓൺലൈൻ ക്ലാസിൽ പങ്കെടുക്കുന്നതിനായി കുട്ടിയ്ക്ക് മൊബൈൽ ഫോൺ വാങ്ങി നൽകിയിരുന്നു. ഇതിലെ നമ്പർ കൈക്കലാക്കിയ റഷാദ് ലഹരി സംഘത്തിന് കൈമാറുകയായിരുന്നു.
പ്രദേശത്തെ ആളൊഴിഞ്ഞ വീട്ടിൽവെച്ചാണ് ഇവർ കുട്ടിയ്ക്ക് കഞ്ചാവ് നൽകുക. തുടർന്ന് ഉന്മാദാവസ്ഥയിൽ എത്തുന്ന കുട്ടിയെ ഇവർ പീഡനത്തിനും ഇരയാക്കാറുണ്ട്. പീഡനം സഹിക്കവയ്യാതെ ആയപ്പോൾ കുട്ടി വിവരം വീട്ടിൽ പറയുകയായിരുന്നു.
