കോഴിക്കോട് : കോഴിക്കോട് കോര്‍പ്പറേഷന്‍ അക്കൗണ്ട് തട്ടിപ്പുമായി ബന്ധപ്പെട്ട് നടത്തിയ അന്വേഷണങ്ങളില്‍ 12 കോടി 68 ലക്ഷം രൂപയുടെ തിരിമറി നടന്നിട്ടുണ്ടെന്ന് ക്രൈംബ്രാഞ്ച്. ബാങ്ക് അക്കൗണ്ടുകളിലും രേഖകളിലുമായി നടത്തിയ പരിശോധനയിലാണ് ഇക്കാര്യം കണ്ടെത്തിയത്. കോഴിക്കോട് ജില്ലാ ക്രൈംബ്രാഞ്ചാണ് കേസില്‍ അന്വേഷണം നടത്തുന്നത്. 15 കോടി 24 ലക്ഷം രൂപ നഷ്ടപ്പെട്ടെന്നാണ് കോര്‍പ്പറേഷന്റെ പരാതി.
ശനിയാഴ്ചയാണ് ജില്ലാ ക്രൈംബ്രാഞ്ച് അസിസ്റ്റന്‍ഫ് കമ്മീഷണര്‍ ടി എ ആന്റണിയുടെ നേതൃത്വത്തിലുള്ള സംഘം കേസ് ഏറ്റെടുത്തത്. ലോക്കല്‍ പോലീസ് നല്‍കിയ രേഖകളും അക്കൗണ്ടുമായി ബന്ധപ്പെട്ട മറ്റ് വിവരങ്ങളും ശേഖരിച്ചു. ഇതുവരെയുള്ള പരിശോധനയില്‍ 12 കോടി 68 ലക്ഷം രൂപയുടെ തിരിമറിയാണ് ക്രൈംബ്രാഞ്ച് കണ്ടെത്തിയത്.
പല അക്കൗണ്ടുകളില്‍ നിന്നായാണ് തട്ടിപ്പുകള്‍ നടത്തിയതെന്ന് അന്വേഷണത്തില്‍ കണ്ടെത്തിയിട്ടുണ്ട്. പല അക്കൗണ്ടിലേക്കും തിരിച്ചും ഇടപാടുകള്‍ നടത്തിയതിനാല്‍ ബാങ്ക്, കോര്‍പ്പറേഷന്‍ എന്നിവയുടെ രേഖകള്‍ ക്രൈംബ്രാഞ്ച് വിശദമായി പരിശോധിക്കും. കേസിലെ പ്രതിയായ പഞ്ചാബ് നാഷണല്‍ ബാങ്ക് മാനേജര്‍ എം.പി. റിജിലിന്റെ ആക്‌സിസ് ബാങ്കിലെ അക്കൗണ്ടും ക്രൈംബ്രാഞ്ച് പരിശോധിച്ചു.
ഓണ്‍ലൈന്‍ റമ്മിക്ക് ഉള്‍പ്പടെ ഇയാളുടെ അക്കൗണ്ടില്‍ നിന്ന് പണമിടപാടുകള്‍ നടത്തിയിട്ടുണ്ട്. എന്നാല്‍ 15 കോടി 24 ലക്ഷം രൂപ നഷ്ടപ്പെട്ടെന്നാണ് കോര്‍പ്പറേഷന്റെ പരാതിയില്‍ പറയുന്നതെങ്കിലും 12 കോടിയുടെ തട്ടിപ്പ് നടന്നെന്നാണ് ബാങ്ക് അധികൃതര്‍ പുറത്തുവിടുന്ന കണക്കുകള്‍.
അതിനിടെ കോര്‍പ്പറേഷനിലെ വെട്ടിപ്പ് പുറത്തുവന്നതോടെ പണം നഷ്ടപ്പെട്ടതായി സ്വകാര്യ വ്യക്തികളും ആരോപണവുമായി രംഗത്ത് എത്തിയിട്ടുണ്ട്. ചിലപ്പോള്‍ പരാതിക്കാരുടെ എണ്ണം ഇനിയും ഉയര്‍ന്നേക്കാം. അതേസമയം കേസില്‍ ഒളിവില്‍ കഴിയുന്ന പ്രതി റിജിലിന്റെ മുന്‍കൂര്‍ ജാമ്യാപേക്ഷ ശനിയാഴ്ച കോഴിക്കോട് ജില്ലാ കോടതി പരിഗണിക്കും. കഴിഞ്ഞ 29ാം തിയതി മുതല്‍ റിജില്‍ ഒളിവിലാണെന്നാണ് പോലീസ് അറിയിച്ചിരിക്കുന്നത്.
പ്രതികരിക്കാൻ ഇവിടെ എഴുതുക: