അഹമ്മദാബാദ്: ഗുജറാത്തില്‍ ബിജെപി സര്‍വ കാല റെക്കോര്‍ഡ് വിജയം നേടുമെന്ന് ദേശീയ അധ്യക്ഷന്‍ ജെ.പി. നദ്ദ. സംസ്ഥാനത്തെ തെരഞ്ഞെടുപ്പ് വിജയം ഏകപക്ഷീയ മാകുമെന്നും സ്വകാര്യചാനലിന് നല്‍കിയ അഭിമുഖത്തില്‍ അദ്ദേഹം പറഞ്ഞു.
ഗുജറാത്തിലെ ഒന്നാംഘട്ട തെരഞ്ഞെടുപ്പ് നടക്കുന്ന സൗരാഷ്‌ട്ര മേഖലയില്‍ ആം ആദ്മി സീറ്റുകള്‍ നേടുമോ എന്ന ചോദ്യത്തിന്, അതിന് യാതൊരുസാധ്യതയുമില്ലെന്നായിരുന്നു മറുപടി. ഉത്തര്‍പ്രദേശ്, ഗോവ, ഉത്തരാഖണ്ഡ് എന്നിവിടങ്ങളില്‍ ആം ആദ്മി പരാജയം നേരിട്ടു. ദല്‍ഹിയിലും പഞ്ചാബിലും ആം ആദ്മി വിജയിച്ചത് അവര്‍ ബിജെപിയുമായി പോരാടാത്തതുകൊണ്ടാണ്. ഗുജറാത്തിലെ അന്തരീക്ഷം മുഴുവന്‍ വ്യക്തമാണ്.
കോണ്‍ഗ്രസിന് ദിശ നഷ്ടപ്പെട്ടതായും തെരഞ്ഞെടുപ്പിനെ നേരി ടാന്‍ എങ്ങനെ മുന്നോട്ട് പോകണമെന്ന് ഒരു പിടിയുമില്ലെന്നും ജെ.പി. നദ്ദ പറഞ്ഞു. ബിജെപിയെ കോണ്‍ഗ്രസ് വളരെയധികം ഭയപ്പെടുന്നു. പ്രധാനമന്ത്രി നരേന്ദ്രമോദിക്കെതിരെ കോണ്‍ഗ്രസ് നേതാക്കള്‍ ഉപയോഗിക്കുന്ന വാക്കുകള്‍ അവരുടെ മാനസികാവസ്ഥയാണ് പ്രതിഫലിപ്പിക്കുന്നതെന്നും പ്രധാനമന്ത്രി മോദിയെ രാവണന്‍ എന്ന് വിളിച്ച കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെയ്‌ക്ക് മറുപടിയായി ജെ.പി. നദ്ദ പറഞ്ഞു.
പ്രതികരിക്കാൻ ഇവിടെ എഴുതുക: