കണ്ണൂര്‍: കണ്ണൂര്‍ സര്‍വകലാശാലയില്‍ അസോസിയേറ്റ് പ്രൊഫസര്‍ തസ്തികയിലേക്കുള്ള മുഖ്യമന്ത്രിയുടെ പ്രൈവറ്റ് സെക്രട്ടറി കെ.കെ. രാഗേഷിന്റെ ഭാര്യ പ്രിയ വര്‍ഗീസിന്റെ ഓണ്‍ലൈന്‍ അഭിമുഖത്തിന്റെ വീഡിയോ പുറത്തുവിടാനാകില്ലെന്ന് കണ്ണൂര്‍ സര്‍വകലാശാല. വിവരാവകാശ നിയമ പ്രകാരം നല്‍കിയ അപേക്ഷയിലാണ് ഇക്കാര്യം വ്യക്തമാക്കുന്നത്. അഭിമുഖ വീഡിയോ പുറത്തുവിടാന്‍ തടസ്സമില്ലെന്ന് അറിയിച്ചതിന് പിന്നാലെയാണ് വിഷയം കോടതിയുടെ പരിഗണനയിലുള്ളതിനാല്‍ വിവരങ്ങള്‍ പുറത്തുവിടാനാകില്ലെന്ന വിശദീകരണം. വിഷയം കോടതിയുടെ പരിഗണനയില്‍ ഉള്ളതിനാല്‍ വിവരം നല്‍കാനാകില്ലെന്ന നിലപാട് വിവരാവകാശ നിയമത്തിന്റെ ലംഘനമാണെന്ന് നിയമരംഗത്തെ വിദഗ്ധര്‍ ചൂണ്ടിക്കാട്ടുന്നു. ഒത്തുകളി പുറത്താകുമോ എന്ന ഭയത്തില്‍ സര്‍വകലാശാല ഒഴിഞ്ഞുമാറുകയാണെന്ന് സെനറ്റ് അംഗം ഡോ. ആര്‍.കെ ബിജുവും വിമര്‍ശിച്ചു. നിലവില്‍ പ്രിയാ വര്‍ഗീസിന്റെ നിയമനം ഹൈക്കോടതി മരവിപ്പിച്ചിരിക്കുകയാണ്.
റിസര്‍ച്ച് സ്‌കോര്‍ 651 ഉള്ള രണ്ടാം റാങ്കുകാരനായ ജോസഫ് സ്‌കറിയയെ തഴഞ്ഞ് എറ്റവും കുറഞ്ഞ റിസര്‍ച്ച് സ്‌കോറായ 156 മാത്രമുളള പ്രിയ വര്‍ഗ്ഗീസിനായിരുന്നു കണ്ണൂര്‍ സര്‍വ്വകലാശാല ഒന്നാം റാങ്ക് നല്‍കിയത്. മലയാളം അസോസിയേറ്റ് പ്രഫസര്‍ തസ്തികയിലേക്കുള്ള അഭിമുഖത്തിലാണ് ഇത്തരത്തില്‍ മാര്‍ക്ക് നല്‍കിയത്. യുജിസി മാനദണ്ഡങ്ങള്‍ പാലിക്കാതെയാണ് പ്രിയ വര്‍ഗീസിനെ നിയമിച്ചതെന്ന ആക്ഷേപം നിലനില്‍ക്കേയാണ് അഭിമുഖത്തിലും സര്‍വകലാശാല ഒന്നാം റാങ്ക് നല്‍കിയത്. സംഭവം വിവാദമായതോടെ നിയമനത്തെ ന്യായീകരിച്ച് പ്രിയ വര്‍ഗീസ് ഫേസ്ബുക്കില്‍ കുറിപ്പെഴുതിയിരുന്നു.റിസര്‍ച്ച് സ്‌കോറല്ല മാനദണ്ഡമെന്നും ഇന്റര്‍വ്യൂവില്‍ തന്റെ പ്രകടനം മികച്ചതായിരുന്നുവെന്നുമായിരുന്നു പ്രിയയുടെ അവകാശവാദം. അത് തെളിയിക്കാന്‍ വിവരാവകാശപ്രകാരം ഓണ്‍ലൈന്‍ അഭിമുഖത്തിന്റെ വീഡിയോ കിട്ടുമെന്നും അത് സംപ്രേഷണം ചെയ്യാന്‍ ധൈര്യമുണ്ടോ എന്നുമായിരുന്നു മാദ്ധ്യമങ്ങളോടുള്ള പ്രിയയുടെ വെല്ലുവിളി. തുടര്‍ന്ന് അഭിമുഖത്തിന്റെ ദൃശ്യങ്ങള്‍ പുറത്തുവിടുന്നതില്‍ സര്‍വകലാശാലയ്‌ക്ക് തടസ്സമില്ലെന്ന് അറിയിച്ചിരുന്നു. എന്നാല്‍ വിവരാവകാശ പ്രകാരമുള്ള ചോദ്യത്തിനാണ് കോടതി പരിഗണനയിലുള്ളതിനാല്‍ പുറത്തുവിടാനാകില്ലെന്ന വിശദീകരണവുമായി എത്തി കണ്മൂര്‍ സര്‍വകലാശാല തടിയൂരിയത്.
പ്രതികരിക്കാൻ ഇവിടെ എഴുതുക: