തിരുവനന്തപുരം: തിരുവനന്തപുരം നഗരസഭയിലെ താല്ക്കാലിക നിയമനങ്ങളിലേക്ക് സഖാക്കളെ ആവശ്യപ്പെട്ട് സിപിഎം തിരുവനന്തപുരം ജില്ലാ സെക്രട്ടറി ആനാവൂര് നാഗപ്പന്, മേയര് ആര്യ രാജേന്ദ്രന് കത്ത് സംബന്ധിച്ചു ക്രൈംബ്രാഞ്ച് അന്വേഷിക്കും. പ്രചരിക്കുന്ന കത്തിനെക്കുറിച്ച് അന്വേഷിക്കണമെന്ന് ആവശ്യപ്പെട്ട് മേയര് നല്കിയ പരാതിയില് ക്രൈംബ്രാഞ്ച് അന്വേഷണം നടത്താന് സംസ്ഥാന പൊലീസ് മേധാവി അനില് കാന്ത് ഉത്തരവിട്ടു.
ക്രൈംബ്രാഞ്ച് തിരുവനന്തപുരം യൂണിറ്റ് എസ്പി എസ്.മധുസൂദനന്റെ മേല്നോട്ടത്തില് ഡിവൈഎസ്പി ജലീല് തോട്ടത്തില് ആകും കേസ് അന്വേഷിക്കുക. അതേസമയം, കത്തിനെക്കുറിച്ച് അന്വേഷിക്കാന് സിപിഎമ്മും തീരുമാനിച്ചു. ഇന്നു ചേര്ന്ന ജില്ലാ കമ്മിറ്റി യോഗത്തിലാണ് ധാരണയായത്. വിഷയത്തില് സെക്രട്ടറി ആനാവൂര് നാഗപ്പന് മാധ്യമങ്ങളെ കാണും. കത്ത് താന് എഴുതിയതല്ലെന്ന് മേയര് കഴിഞ്ഞ ദിവസം വ്യക്തമാക്കിയിരുന്നു. ഇക്കാര്യം മുഖ്യമന്ത്രി പിണറായി വിജയനെയും സിപിഎം നേതൃത്വത്തെയും അറിയിച്ചിരുന്നു. എന്നാല്, കത്ത് വ്യാജമാണോ എന്ന മാധ്യമങ്ങളുടെ ചോദ്യത്തിന് അറിയില്ല എന്നായിരുന്നു ആനാവൂര് നാഗപ്പന്റെയും ആര്യയുടേയും പ്രതികരണം.
