രാജ്യത്ത് ആഭ്യന്തര യുദ്ധഭീഷണിയുമായി എസ് ഡി പി ഐ

കേരള പിറവി ദിനാശംസയുടെ മറവിൽ രാജ്യത്ത് ആഭ്യന്തര യുദ്ധഭീഷണിയുമായി എസ്ഡിപിഐ കേരള സംസ്ഥാന വൈസ് പ്രസിഡൻ്റ് പി.അബ്ദുൽ ഹമീദ് രംഗത്ത്.

എസ്ഡിപിഐയുടെ ഫെയ്സ് ബുക്ക് പേജിലൂടെ പുറത്തുവിട്ട കേരള പിറവി സന്ദേശത്തിലാണ് രാജ്യത്ത് കലാപം സൃഷ്ടിക്കാനുള്ള എസ് ഡി പി ഐ യുടെ അജൻഡ വെളിപ്പെട്ടത്.

സി എ എ വിരുദ്ധ സമരത്തിന്റെ പേരിൽ രാജ്യവ്യാപക കലാപത്തിനുള്ള പോപ്പുലർ ഫ്രണ്ട് ശ്രമം പരാജയപ്പെട്ടിരുന്നു. ഭീകര പ്രവർത്തനത്തിനായി വിദേശ ഫണ്ട് സമാഹരിക്കുകയും വിവിധ സംസ്ഥാനങ്ങളിൽ ആയുധ പരിശീലന ക്യാംപുകൾ സംഘടിപ്പിക്കുകയും ചെയ്ത പോപ്പുലർ ഫ്രണ്ടിനെയും അനുബന്ധ സംഘടനകളെയും കേന്ദ്ര സർക്കാർ നിരോധിച്ചിരുന്നു. എന്നാൽ പോപ്പുലർ ഫ്രണ്ട് നേതൃത്വം രൂപം കൊടുത്ത എസ്ഡിപിഐയെ ഇനിയും നിരോധിച്ചിട്ടില്ല.

പോപ്പുലർ ഫ്രണ്ട് നിരോധനത്തിൽ അമ്പരന്നു നിന്ന എസ്ഡിപിഐ നേതൃത്വം പ്രക്ഷോഭ പരിപാടികളുമായി രാജ്യത്തു കലാപങ്ങൾ സൃഷ്ടിക്കാനുള്ള തയാറെടുപ്പിലാണ്.

പാർലമെൻ്റിന്റെ ഔദ്യോഗിക ഭാഷാ സമിതി സമർപ്പിച്ച നിർദേശങ്ങളിൽ ഹിന്ദു – ഹിന്ദി – ഹിന്ദുസ്ഥാനി അജൻഡയാണെന്ന ആരോപണവുമായാണ് എസ്ഡിപിഐ രംഗത്തിറങ്ങുന്നത്.

കേരള പിറവി ദിനമായ നവംബർ ഒന്നിനു എസ്ഡിപിഐ കോട്ടയം പ്രസ് ക്ലബിൽ സംഘടിപ്പിക്കുന്ന ഫെഡറലിസവും ഭാഷാ വൈവിധ്യങ്ങളും സെമിനാറിലൂടെ ലക്ഷ്യമിടുന്നതു ഭാഷയുടെ പേരിലുള്ള പ്രക്ഷോഭങ്ങൾക്കു തുടക്കമിടുകയാണ്.

അതിനു മുന്നോടിയായാണ് എസ് ഡി പി ഐ നേതാവിന്റെ ആഭ്യന്തര യുദ്ധ ഭീഷണി .

കേരള പത്രപ്രവർത്തക യൂണിയൻ കോട്ടയം ഘടകമാണ് എസ്ഡിപിഐക്ക് വേദി ഒരുക്കുന്നതെന്നതാണ് ഖേദകരമായ വസ്തുത. സിദ്ദിഖ് കാപ്പൻ കേസ് നടത്തിപ്പിലൂടെ വെളിപ്പെട്ട പോപ്പുലർ ഫ്രണ്ട് – കെയുഡബ്ല്യുജെ ബാന്ധവം എസ് ഡി പി ഐയുമായും തുടർന്നു പോകുന്നു.

ഹിന്ദി വിരുദ്ധ പ്രക്ഷോഭത്തിനു ഉത്തരേന്ത്യയിൽ തിരിച്ചടി കിട്ടുമെന്നതിനാൽ ദക്ഷിണേന്ത്യയിലെ രാഷ്‌ട്രീയ പാർട്ടികളുമായി സഹകരിച്ചാകും നീക്കങ്ങൾ.

മലബാർ പ്രത്യേക സംസ്ഥാനം, ദക്ഷിണേന്ത്യൻ സംസ്ഥാനങ്ങളുടെ കോൺഫെഡറേഷൻ തുടങ്ങിയ പോപ്പുലർ ഫ്രണ്ടിന്റെ രഹസ്യ അജൻഡകൾ ഇനി എസ്ഡിപിഐ ഏറ്റെടുക്കും. ദക്ഷിണേന്ത്യയിൽ മാത്രമുള്ള ചില രാഷ്‌ട്രീയ പാർട്ടികളുടെ പിന്തുണയും ഇതിനുണ്ടാകും.