ന്യൂദല്ഹി : ഡോ. എപിജെ അബ്ദുള് കലാം സാങ്കേതിക സര്വകലാശാലയില് (കെടിയു) വൈസ് ചാന്സലറെ നിയമിച്ചത് യുജിസി ചട്ടങ്ങള് പാലിച്ചല്ലെന്ന് സുപ്രീംകോടതി. ഇതിനെ തുടര്ന്ന് ഡോ. രാജശ്രീ എം.എസിനെ ചാന്സിലറായി നിയമിച്ചത് സുപ്രീംകോടതി റദ്ദാക്കി. ജസ്റ്റിസ് എം.ആര്. ഷാ, സി.ടി. രവികുമാര് എ്ന്നിവരടങ്ങിയ ഡിവിഷന് ബെഞ്ചിന്റേതാണ് ഉത്തരവ്.
കെടിയു വൈസ് ചാന്സലറായി രാജശ്രീയെ നിയമിച്ചത് ചോദ്യം ചെയ്ത് കൊച്ചി ശാസ്ത്ര സാങ്കേതിക സര്വകലാശാല മുന് ഡീന് പി.എസ്. ശ്രീജിത്താണ് കോടതിയെ സമീപിച്ചത്. യുജിസി ചട്ടങ്ങള് ഒരിക്കല് അംഗീകരിച്ചിട്ടുണ്ടെങ്കില്, അത് നടപ്പാക്കാന് ബാധ്യത ഉണ്ടെന്ന സുപ്രീംകോടതിയുടെ സമീപകാല വിധിയുടെ അടിസ്ഥാനത്തിലാണ് ഹര്ജി നല്കിയത്. സാങ്കേതിക സര്വകലാശാല വിസി നിയമനത്തിന് ചാന്സലര്ക്ക് പാനല് കൈമാറുന്നതിന് പകരം ഒരു വ്യക്തിയുടെ പേര് മാത്രമാണ് കൈമാറിയത്. രാജശ്രീയെ നിയമിച്ചത് യുജിസി ചട്ടപ്രകാരമല്ലെന്ന് സുപ്രീംകോടതി നേരത്തെ നിരീക്ഷിച്ചിരുന്നു.
യുജിസി ചട്ടങ്ങള് പ്രകാരം വൈസ് ചാന്സലര് നിയമനത്തിന് ഒന്നിലധികം പേരുകള് അടങ്ങുന്ന പാനലാണ് സെര്ച്ച് കമ്മിറ്റി ചാന്സലര്ക്ക് കൈമാറണം. എന്നാല് സാങ്കേതിക സര്വകലാശാലയുടെ വൈസ് ചാന്സലര് നിയമനത്തിന് ഒരാളുടെ പേര് മാത്രമാണ് സമിതി ചാന്സലര്ക്ക് കൈമാറിയത്. ഈ നടപടി ചട്ടലംഘനമാണെന്നാണ് കോടതിയുടെ നീരീക്ഷണം.
2013 ലെ യു ജി സി ചട്ടങ്ങള് ലംഘിച്ച് കൊണ്ടാണ് നിയമനമെന്നായിരുന്നു ഹര്ജിക്കാരന്റെ വാദം. എന്നാല് സംസ്ഥാന നിയമത്തിന്റെ അടിസ്ഥാനത്തിലാണ് നിയമനമെന്നും ഇതിന് യുജിസിയുടെ അംഗീകാരം ലഭിച്ചതാണെന്നും രാജശ്രീയുടെയും സംസ്ഥാന സര്ക്കാരിന്റേയും അഭിഭാഷകര് കോടതിയില് വാദിച്ചിരുന്നു. 2013ലെ യുജിസി ചട്ടങ്ങള് പ്രകാരം സംസ്ഥാന നിയമത്തിന്റെ അടിസ്ഥാനത്തില് നിയമനം നടത്താന് അധികാരമുണ്ടന്നും സംസ്ഥാന സര്ക്കാരും രാജശ്രീയുടെ അഭിഭാഷകനും അറിയിച്ചെങ്കിലും കോടതി ഇക്കാര്യം തള്ളുകയായിരുന്നു.
