കൊട്ടാരക്കര: വിവാഹ അഭ്യര്ഥന നിരസിച്ച പട്ടികജാതി യുവതിയെ കെട്ടിയിട്ട് മര്ദ്ദിച്ച് കൊലപ്പെടുത്താന് ശ്രമിച്ച കേസില് യുവാവ് അറസ്റ്റില്. പുത്തൂര് എസ്എന് പുരം ലാല്സദനില് ലാലുമോന്(34) ആണ് പിടിയിലായത്. ഞായറാഴ്ച വൈകിട്ടാണ് സംഭവം.
സംഭവത്തെ കുറിച്ച് പോലീസ് പറയുന്നതിങ്ങനെ, പുത്തൂരിലെ സ്വകാര്യ സ്ഥാപനത്തില് ജോലി ചെയ്യുന്ന യുവതി സ്ഥാപനത്തില് നിന്നും വീട്ടിലേക്കുള്ള വഴിയില്വെച്ച് ലാലു പതുങ്ങിയിരുന്ന് ആക്രമിക്കുകയായിരുന്നു. യുവതിയെ തടഞ്ഞുനിര്ത്തി അടിക്കുകയും റബ്ബര്പുരയിടത്തിനുള്ളിലേക്ക് വലിച്ചിഴച്ചു കൊണ്ടു പോകുകയും തുടര്ന്ന് റബ്ബര്മരത്തില് കെട്ടിയിടുകയും വായ്ക്കുള്ളില് കരിയില കുത്തിത്തിരുകുകയും ക്രൂരമായി മര്ദ്ദിക്കുകയും യുവതിയുടെ കൈയിലിരുന്ന മൊബൈല് ഫോണ് എറിഞ്ഞുടക്കുകയും ചെയ്തു.
ഈ സമയം അതുവഴി പ്രദേശവാസിയായ ഒരാള് വന്നതോടെ ലാലു പിന്മാറുകയായിരുന്നു. രക്ഷപ്പെട്ട യുവതി ഓടി വീട്ടിലെത്തി അമ്മയുമായി പുത്തൂര് പോലീസ് സ്റ്റേഷനിലെത്തി പരാതി നല്കിയ ശേഷം കൊട്ടാരക്കര താലൂക്ക് ആശുപത്രിയില് ചികിത്സ തേടി. രാത്രിയോടെ ഇയാളെ പോലീസ് കസ്റ്റഡിയെലടുക്കുകയും ചെയ്തു.
