ന്യൂദല്‍ഹി: റിലയന്‍സ് ഇന്‍ഡസ്ട്രീസ് ചെയര്‍മാന്‍ മുകേഷ് അംബാനിക്കും കുടുംബത്തിനും നേരെ വീണ്ടും വധഭീഷണി. ഉച്ചയ്‌ക്ക് 12.57 ഓടെയാണ് മുംബൈയിലെ എച്ച്എന്‍ റിലയന്‍സ് ഫൗണ്ടേഷന്‍ ആശുപത്രിയിലേക്ക് ഫോണ്‍ വിളിച്ചാണ് അജ്ഞാതന്‍ ഭീഷണി മുഴക്കിയത്. മുകേഷ് അംബാനി, ഭാര്യ നിതാ അംബാനി, മക്കളായ ആകാഷ് അംബാനി, ആനന്ദ് അംബാനി എന്നിവര്‍ക്ക് നേരെയായിരുന്നു ഭീഷണി.
ബുധനാഴ്‌ച്ചയാണ് ആശുപത്രിയിലെ ലാന്റ്‌ലൈന്‍ നമ്പരിലേക്ക് കോള്‍ വന്നത്. സംഭവത്തില്‍ പോലീസ് അന്വേഷണം ആരംഭിച്ചിട്ടുണ്ട്. ഡിബി മാര്‍ഗ് പോലീസ് സ്റ്റേഷനിലാണ് പരാതി നല്‍കിയത്. ഫോണ്‍ ചെയ്ത് ഭീഷണിപ്പെടുത്തിയയാളെ ഉടന്‍ കണ്ടുപിടിക്കുമെന്ന് മുംബൈ പോലീസ് അറിയിച്ചു. സംഭവത്തിന് ശേഷം മുകേഷ് അംബാനിക്കും കുടുംബത്തിനുമുള്ള സുരക്ഷ വര്‍ദ്ധിപ്പിച്ചു.
മുകേഷ് അംബാനിക്കും കുടുംബത്തിനും നേരെ വധഭീഷണി ഉയര്‍ത്തുക മാത്രമല്ല, ആശുപത്രി തകര്‍ക്കുമെന്നും അജ്ഞാതന്‍ ഭീഷണിപ്പെടുത്തിയിട്ടുണ്ട്. ഇക്കഴിഞ്ഞ ഓഗസ്റ്റ് 15 നും റിലയന്‍സ് ഫൗണ്ടേഷന്‍ ആശുപത്രിയില്‍ ഭീഷണി കോള്‍ വന്നിരുന്നു. നാല് തവണയാണ് മുകേഷ് അംബാനിക്ക് വധഭീഷണി മുഴക്കി അന്ന് കോളുകള്‍ വന്നത്. സംഭവത്തില്‍ നല്‍കിയ പരാതിയില്‍ ഡിബി മാര്‍ഗ് പോലീസ് ദഹിസറില്‍ നിന്ന് ഒരാളെ അറസ്റ്റ് ചെയ്തിരുന്നു.
പ്രതികരിക്കാൻ ഇവിടെ എഴുതുക: