കൊടുങ്ങല്ലൂര്: കോട്ടപ്പുറം മുസിരിസ് പാര്ക്കില് നിന്നും കഞ്ചാവും ലഹരി ഗുളികയും ഉപയോഗിച്ച് ബോധമില്ലാതെ ഇരുന്നിരുന്ന യുവാക്കളെ എക്സൈസ് പിടികൂടി. ഇവരുടെ പക്കല് നിന്നും ലഹരി ഗുളിക കണ്ടെടുത്തു.
കൊല്ലം പത്തനാപുരം മതിലകം,പെരിഞ്ഞനം, കയ്പമംഗലം സ്വദേശികളായ നെസ്മല്, നിബിന്, അന്സാഫ്, അഭിജിത്ത് എന്നിവരെയാണ് നര്കോട്ടിക്ക് സ്പെഷ്യല് ഡ്രൈവിന്റെ ഭാഗമായി കൊടുങ്ങല്ലൂര് എക്സൈസ് റേഞ്ച് ഇന്സ്പെക്ടര് ഷാംനാഥും സംഘവും പിടികൂടിയത്.
ബംഗളുരുവിലേക്ക് പോകാന് തയ്യാറെടുക്കുകയായിരുന്നു ഇവരെന്ന് എക്സൈസ് അധികൃതര് പറഞ്ഞു. മറ്റു സംസ്ഥാനങ്ങളില് വിനോദ യാത്രയെന്ന വ്യാജേന പോയി മയക്കുമരുന്ന് കേരളത്തിലേക്ക് കടത്തുന്നുണ്ടെന്ന് എക്സൈസിന് വിവരം ലഭിച്ചിരുന്നു. മുസിരിസ് പാര്ക്കില് ഇത്തരത്തില് നിരവധി യുവാക്കള് തമ്പടിക്കുന്നതായി വിവരം ലഭിച്ചിട്ടുണ്ടെന്നും വരും ദിവസങ്ങളില് കൂടുതല് അറസ്റ്റ് ഉണ്ടാകുമെന്നും എക്സൈസ് അറിയിച്ചു.
