തിരുവനന്തപുരം : കെഎസ്ആര്‍ടിസിയില്‍ രണ്ടുമാസമായി മുടങ്ങിയ ശമ്പള വിതരണം തുടങ്ങി. ഓണത്തിന് മുമ്പ് നല്‍കണമെന്ന ഹൈക്കോടതിയുടെ നിര്‍ദ്ദേശപ്രകാരം ജൂലൈ, ഓഗസ്റ്റ് മാസങ്ങളിലെ ശമ്പള കുടിശ്ശികയുടെ മൂന്നിലൊന്നാണ് വിതരണം ചെയ്യുന്നത്. ശനിയും തിങ്കളുമായി ശമ്പള വിതരണം പൂര്‍ത്തിയാക്കുമെന്ന് ഗതാഗത വകുപ്പ് മന്ത്രി ആന്റണി രാജു അറിയിച്ചു.
ഹൈക്കോടതി നിര്‍ദ്ദേശ പ്രകാരം ശമ്പള വിതരണത്തിനായി 50 കോടി രൂപ കഴിഞ്ഞ ദിവസം സര്‍ക്കാര്‍ കെഎസ്ആര്‍ടിസിക്ക് കൈമാറിയിരുന്നു. ഇതുപയോഗിച്ചാണിപ്പോള്‍ ശമ്പള വിതരണം പൂര്‍ത്തിയാക്കുന്നത്.
അതേസമയം തിങ്കളാഴ്ച കെഎസ്ആര്‍ടിസിയുടെ ഉന്നതതല യോഗം വിളിച്ചു ചേര്‍ത്തിട്ടുണ്ട്. കെഎസ്ആര്‍ടിസിയുടെ ഗതി നിര്‍ണയിക്കുന്നതാണ് ഇതെന്നും ആന്റണി രാജു അറിയിച്ചു. ഡ്യൂട്ടി പരിഷ്‌കരണം ഉള്‍പ്പെടെയുള്ള കാര്യങ്ങളില്‍ അന്ന് തീരുമാനമാകുമെന്നാണ് പ്രതീക്ഷ. ജീവനക്കാര്‍ക്ക് കൂപ്പണ്‍ അടിച്ചേല്‍പ്പിക്കില്ലെന്നും താല്‍പര്യം ഉള്ളവര്‍ വാങ്ങിയാല്‍ മതിയെന്നും മന്ത്രി കൂട്ടിച്ചേര്‍ത്തു.
അതിനിടെ ഗതാഗത മന്ത്രി ആന്റണി രാജുവിന്റെ വാഹനം കെഎസ്ആര്‍ടിസി ജീവനക്കാര്‍ തടഞ്ഞു. കോഴിക്കോട് കട്ടാങ്ങലില്‍ ഐഎന്‍ടിയുസി യൂണിയനില്‍പ്പെട്ട രണ്ട് ജീവനക്കാരാണ് ഇത്തരത്തില്‍ പ്രതിഷേധിച്ചത്. ഹൈക്കോടതി നിര്‍ദേശപ്രകാരമുള്ള കൂപ്പണ്‍ തങ്ങള്‍ക്കുവേണ്ടെന്നും പകരം ശമ്പളം വേണമെന്നും ആവശ്യപ്പെട്ടായിരുന്നു പ്രതിഷേധം. ഇവരെ പോലീസ് കസ്റ്റഡിയിലെടുത്തു.
പ്രതികരിക്കാൻ ഇവിടെ എഴുതുക: