പാലക്കാട് : ലൈംഗിക പീഡനാരോപണത്തിന് പിന്നാലെ സിപിഎം പാലക്കാട് ജില്ല സെക്രട്ടേറിയറ്റ് അംഗവും കെടിഡിസി ചെയര്‍മാനുമായ പി കെ ശശിക്കെതിരെ അഴിമതി ആരോപണവും. പാര്‍ട്ടിയുടെ അനുമതിയില്ലാതെ സഹകരണ സ്ഥാപനങ്ങളില്‍ അനധികൃത നിയമനം നടത്തി പി.കെ. ശശി ലക്ഷകണക്കിന് രൂപ കൈവശപ്പെടുത്തിയതായാണ് പരാതി.
ഇതുമായി ബന്ധപ്പെട്ട് മണ്ണാര്‍ക്കാട് സിപിഎം ലോക്കല്‍ കമ്മിറ്റി അംഗം മന്‍സൂര്‍ കെ. പാര്‍ട്ടി നേതൃത്വത്തിന് പരാതി നല്‍കി. സംഭവത്തില്‍ ഒരു മാസം മുമ്പ് പരാതി നല്‍കിയതാണെങ്കിലും പാര്‍ട്ടിയുടെ ഭാഗത്തു നിന്നും ഒരു നടപടിയും ഉണ്ടായിട്ടില്ല. അഴിമതി ചോദ്യം ചെയ്യുന്നവരെയും ചൊല്‍പ്പടിക്ക് നില്‍ക്കാത്തവരെയും പാര്‍ട്ടിയില്‍ നിന്ന് ഇല്ലാതാക്കുന്ന നടപടിയാണ് പി.കെ. ശശിയുടേതെന്നും മന്‍സൂറിന്റെ പരാതിയില്‍ പറയുന്നുണ്ട്. സിപിഎം സംസ്ഥാന- ജില്ല നേതൃത്വങ്ങള്‍ക്കും പരാതി നല്‍കിയിട്ടുണ്ട്.
കഴിഞ്ഞ ജൂണിലാണ് സിപിഎം മണ്ണാര്‍ക്കാട് ലോക്കല്‍ കമ്മിറ്റി അംഗവും നഗരസഭ കൗണ്‍സിലറുമായ മന്‍സൂര്‍ കെ, പി.കെ. ശശിക്കെതിരെ സംസ്ഥാന-ജില്ല നേതൃത്വങ്ങള്‍ക്ക് രേഖാമൂലം പരാതി നല്‍കിയത്. സിപിഎം ഭരിക്കുന്ന സഹകരണ ബാങ്കുകളില്‍ പി.കെ. ശശി നടത്തിയ സാമ്പത്തിക ഇടപാടുകളില്‍ ക്രമക്കേടുകളുണ്ട്. മണ്ണാര്‍ക്കാട് റൂറല്‍ ബാങ്ക്, കുമരംപുത്തൂര്‍ ബാങ്ക്, ഹൗസിങ് സൊസൈറ്റി ഉള്‍പ്പടെ സിപിഎം നിയന്ത്രണത്തിലുളള ബാങ്കുകളില്‍ ലക്ഷകണക്കിന് രൂപ കൈപറ്റി പി.കെ. ശശി അവിടെ നിയമനം നടത്തുകയാണ്. അതില്‍ കൂടുതലും ശശിയുടെ ബന്ധുക്കളും വേണ്ടപ്പെട്ടവരുമാണ്.
പാര്‍ട്ടിയുടെ ഒരു കമ്മിറ്റിയിലും ചര്‍ച്ച ചെയ്യാതെയാണ് അഗ്രികള്‍ച്ചറല്‍ സൊസൈറ്റിയിലും റൂറല്‍ ബാങ്കിലും പി.കെ. ശശിയുടെ ബന്ധുക്കളെ നിയമിച്ചത്. പി.കെ. ശശി അധ്യക്ഷനായ മണ്ണാര്‍ക്കാട്ടെ സ്വാശ്രയ കോളേജിന് വിവിധ സഹകരണ ബാങ്കുകളില്‍ നിന്ന് കോടി കണക്കിന് രൂപ ഓഹരിയായി പിരിച്ചെടുത്തെന്നും ആരോപണമുണ്ട്.
എന്നാല്‍ തനിക്കെതിരെ ഉയര്‍ന്നിട്ടുള്ള ഈ ആരോപണങ്ങളെല്ലാം ശശി നിഷേധിച്ചു. ഇത്തരമൊരു പരാതി പാര്‍ട്ടി ചര്‍ച്ച ചെയ്തിട്ടില്ലെന്നും പ്രതികരിച്ചു. പരാതി കിട്ടിയിട്ടുണ്ടോയെന്ന ചോദ്യത്തിന് സിപിഎം ജില്ല നേതൃത്വവും വ്യക്തമായി പ്രതികരിച്ചിട്ടില്ല.
പ്രതികരിക്കാൻ ഇവിടെ എഴുതുക: