ബെംഗളൂരു: ഹിന്ദു ദൈവങ്ങള്‍ക്കും ബിജെപി സര്‍ക്കാരിനുമെതിരെ ആക്ഷേപങ്ങള്‍ ചൊരിയുന്ന സ്റ്റാന്‍ഡപ് കൊമേഡിയന്‍ മുനവര്‍ ഫറൂഖിയുടെ ബെംഗളൂരുവിലെ പരിപാടി ഹിന്ദു സംഘടനകളുടെ എതിര്‍പ്പ് മൂലം റദ്ദാക്കി. എന്നാല്‍ തന്റെ മുഖം രക്ഷിക്കാന്‍ റദ്ദാക്കലിന് കാരണം ആരോഗ്യപ്രശ്നമാണെന്ന വിശദീകരണമാണ് മുനവര്‍ ഫറൂഖി നല്‍കുന്നത്.
ഹിന്ദു സംഘടനയായ ശ്രീറാം സേനയാണ് എതിര്‍പ്പുമായി രംഗത്തെത്തിയത്. ഇതിന്റെ അടിസ്ഥാനത്തില്‍ പരിപാടി റദ്ദാക്കാന്‍ പൊലീസ് നിര്‍ദേശം നല്‍കുകയായിരുന്നു. ഇന്ത്യയിലെ മറ്റ് നഗരങ്ങളില്‍ നടത്തിയ ഡോംഗ്രി ടു നോ വേര്‍ എന്ന പരിപാടിയായിരുന്നു മുനവര്‍ ബെംഗളൂരുവില്‍ അവതരിപ്പിക്കാനിരുന്നത്.
ആരോഗ്യപ്രശ്നങ്ങള്‍ കാരണം ഫ്ലൈറ്റില്‍ എത്താന്‍ പറ്റിയില്ലെന്നും അടുത്ത ആഴ്ചയിലേക്ക് തന്റെ പ്രോഗ്രാം നീട്ടിവെച്ചുമെന്നുമാണ് മുനവര്‍ ഇന്‍സ്റ്റഗ്രാമിലൂടെ അറിയിച്ചത്. എന്നാല്‍ വാസ്തവത്തില്‍ പൊലീസ് സംഘടകരോട് പരിപാടി റദ്ദാക്കാന്‍ കര്‍ശനമായ നിര്‍ദേശം നല്‍കിയതിന്റെ അടിസ്ഥാനത്തിലാണ് റദ്ദാക്കിയത്. ഹിന്ദു ദൈവങ്ങളെ അപമാനിക്കുന്ന പരാമര്‍ശങ്ങള്‍ നടത്തുന്നതിന്റെ പേരില്‍ ക്രിമിനല്‍ കേസ് നിലവിലുള്ള വ്യക്തിയാണ് മുനവര്‍ ഫറൂഖിയെന്നും അദ്ദേഹത്തിന്റെ പരിപാടി റദ്ദാക്കണമെന്നും ആവശ്യപ്പെട്ട് ശ്രീറാം സേന പുട്ടെന്‍ഹള്ളി പൊലീസില്‍ പരാതി നല്‍കിയിരുന്നു. ഇതിന്റെ അടിസ്ഥാനത്തിലായിരുന്നു പൊലീസ് നടപടി.
പരിപാടി നടത്താന്‍ മുനവര്‍ ഫറൂഖിക്ക് അനുമതി നല്‍കിയിട്ടില്ലെന്ന് ഡിസിപി പി. കൃഷ്ണകാന്ത് പറഞ്ഞു.
പ്രതികരിക്കാൻ ഇവിടെ എഴുതുക: