തിരുവനന്തപുരം: പ്രതിയെ രക്ഷിക്കാന് തൊണ്ടിമുതലില് ക്യത്രിമം കാണിച്ച മന്ത്രി ആന്റണി രാജു രാജിവെക്കണമെന്ന് ആവശ്യപ്പെട്ട് അദ്ദേഹത്തിന്റെ ഔദ്യോഗിക വസതിയിലേക്ക് യുവമോര്ച്ച നടത്തിയ മാര്ച്ചില് സംഘര്ഷം. യുവമോര്ച്ച തിരുവനന്തപുരം ജില്ലാ കമ്മിറ്റിയുടെ നേതൃത്വത്തില് നടത്തിയ പ്രതിഷേധത്തില് മൂന്നു പേര്ക്ക് പരിക്കേറ്റു.
ബാരിക്കേഡ് മറികടക്കാന് ശ്രമിച്ച പ്രവര്ത്തകര്ക്ക് നേരെ പോലീസ് മൂന്നു തവണ ജലപീരങ്കി പ്രയോഗിച്ചു. ജലപീരങ്കി പ്രയോഗത്തില് ആറ്റുകാല് മണ്ഡലം പ്രസിഡന്റ് ശ്യാം ബൈജു, നെടുമങ്ങാട് മണ്ഡലം പ്രസിഡന്റ് പ്രസാദ് മോഹന്, നെടുമങ്ങാട് ടൗണ് ജനറല് സെക്രട്ടറി മഹേഷ് എം.എസ് എന്നിവര്ക്ക് പരിക്കേറ്റു.
ബിജെപി ജില്ലാ വൈസ് പ്രസിഡന്റ് തിരുമല അനില് മാര്ച്ച് ഉദ്ഘാടനം ചെയ്തു. ജില്ലാ ജനറല് സെക്രട്ടറി അഭിജിത്ത് അധ്യക്ഷത വഹിച്ചു. ജില്ലാ നേതാക്കളായ പാപ്പനംകോട് നന്ദു, വലിയവിള ആനന്ദ്, നെടുമങ്ങാട് വിന്ജിത്ത്, പൂവച്ചല് അജി, പാപ്പനംകോട് ശ്രീജിത്ത്, വിജീഷ്, കവിതാ സുഭാഷ്, മണ്ഡലം പ്രസിഡന്റുമാര് എന്നിവര് മാര്ച്ചിന് നേത്യത്വം നല്കി.
