തനതായ ഭക്ഷണ സംസ്‌കാരം നിലനിര്‍ത്തിയിരുന്ന നാടാണ് കേരളം. കാലാവസ്ഥയ്‌ക്കും ഭൂപ്രകൃതിക്കും ഇണങ്ങുന്ന രുചികരമായ നാടന്‍ വിഭവങ്ങള്‍ നമുക്കുണ്ട്. കായും കനിയും അരിയാഹാരങ്ങളും കിഴങ്ങു വിളകളും പാലും പാല്‍ ഉല്പങ്ങളുമാണ് മലയാളിയുടെ പാരമ്പര്യ ഭക്ഷണം. ആവിയില്‍ പുഴുങ്ങിയും ചുട്ടെടുത്തും കഴിച്ചിരുന്ന ആരോഗ്യദായകങ്ങളായ നാട്ടുപലഹാരങ്ങള്‍ ഇന്ന് വിദേശ വിഭവങ്ങള്‍ക്ക് കീഴടങ്ങുന്നു. വഴിയോരക്കടകളില്‍ വൈദേശിക വിഭവങ്ങള്‍ ആധിപത്യമുറപ്പിച്ചു കഴിഞ്ഞു. വിദേശപ്പേരുകളില്‍ വിവിധ രൂപങ്ങളിലെത്തുന്ന മാംസഭക്ഷണം നമ്മുടെ ആരോഗ്യത്തേയും സംസ്‌കാരത്തേയും ബാധിക്കുന്നു. കുട്ടികളാണ് ഇത്തരം കൃത്രിമ രുചിയുടെ കെണിയില്‍ വീണുപോകുന്നത്. അശുദ്ധവും അനാരോഗ്യകരവുമായ വഴിയോര മാംസഭക്ഷണം കഴിച്ച് കുട്ടി മരണപ്പെട്ട സംഭവം നമ്മുടെ കണ്ണുതുറപ്പിക്കേണ്ടതാണ്. ക്യാന്‍സര്‍ ഉള്‍പ്പടെയുളള ഗുരുതരപ്രശ്നങ്ങള്‍ക്കും ചെറുപ്പക്കാരിലെ ജീവിതശൈലീ രോഗങ്ങള്‍ക്കും കാരണമാകുന്ന, നമ്മുടെ കാലാവസ്ഥയ്‌ക്ക് ഇണങ്ങാത്ത ഈ വിരുദ്ധാഹാര രീതി അടിയന്തിരമായി നിരോധിക്കണം.
കുട്ടികളുടെ ശാരീരിക, മാനസികാരോഗ്യത്തിനും സംസ്‌കാരത്തിനും പ്രഥമ പരിഗണന നല്‍കി കൃത്രിമവും വൃത്തിഹീനവും വൈദേശികവുമായ മാംസാധിഷ്ഠിത വിഭവങ്ങള്‍ വിപണികളില്‍ നിരോധിക്കുകയും വഴിയോര ഭക്ഷണ കടകള്‍ക്ക് നിയമപരമായ നിയന്ത്രണം ഏര്‍പ്പെടുത്തുകയും ചെയ്യണമെന്ന് കേരള സര്‍ക്കാരിനോട് ബാലഗോകുലം അഭ്യര്‍ത്ഥിക്കുന്നു.
ഭക്ഷണത്തിലൂടെ നമ്മുടെ സംസ്‌കാരത്തില്‍ വൈദേശികാധിനിവേശം സംഭവിക്കാതിരിക്കാന്‍ അദ്ധ്യാപകരും രക്ഷിതാക്കളും പൊതുസമൂഹവും ജാഗ്രത കാണിക്കണം. ബോധനവും പ്രചാരണവും ശക്തമാക്കി ഭാവിതലമുറയ്‌ക്ക് മികച്ച ആരോഗ്യ സംസ്‌കാരം പകര്‍ന്നു നല്‍കാന്‍ വിദ്യാലയങ്ങള്‍ക്ക് ഉത്തരവാദിത്വമുണ്ട്. അമ്മമാരുടെ നേതൃത്വത്തില്‍ നാട്ടുരുചികള്‍ പരിചയപ്പെടുത്തുന്ന ഗ്രാമീണ ഭക്ഷണശാലകള്‍ വ്യാപകമായി തുടങ്ങണം. സന്നദ്ധസംഘടനകളും സാംസ്‌കാരിക സ്ഥാപനങ്ങളും ഇക്കാര്യത്തില്‍ ക്രിയാത്മകമായി ഇടപെടണം.
വീടുകളിലും വിദ്യാലയങ്ങളിലും കുട്ടികള്‍ പങ്കെടുക്കുന്ന പഠനയാത്രകളിലും മേളകളിലും നാട്ടു ഭക്ഷണം പ്രചരിപ്പിക്കാനും പ്രോത്സാഹിപ്പിക്കാനും നിര്‍ദ്ദേശം നല്‍കണം. രക്ഷിതാക്കള്‍ക്കും കുട്ടികള്‍ക്കും നാട്ടുവിഭവങ്ങളുടെ പോഷകപ്രാധാന്യത്തെപ്പറ്റി ബോധനം നല്‍കണം. പായ്‌ക്കറ്റ് ഭക്ഷ്യവിഭവങ്ങളുടെയും പാനീയങ്ങളുടെയും ഗുണമേന്മ പരിശോധിച്ച് കുട്ടികള്‍ക്ക് ഹിതകരം എന്നു പ്രത്യേകം മുദ്രണം ചെയ്തു മാത്രം വിപണിയിലിറക്കണം. ഭക്ഷണം തയ്യാറാക്കി വിതരണം ചെയ്യുന്ന എല്ലാ സ്ഥാപനങ്ങളിലും നിരന്തര പരിശോധനയും നിയന്ത്രണവും ഏര്‍പ്പെടുത്തണം.
പരമ്പരാഗതവും വിഷരഹിതവും ശിശുസൗഹൃദപരവുമായ ഭക്ഷണം കുട്ടികള്‍ക്ക് ഉറപ്പാക്കണം. കുട്ടികളുടെ ഭക്ഷണത്തില്‍ ആരോഗ്യപ്രശ്നങ്ങളുണ്ടാക്കുന്ന രാസപദാര്‍ത്ഥങ്ങളോ കൃത്രിമ വസ്തുക്കളോ ചേര്‍ക്കുന്നത് ബാലനീതി സംരക്ഷണത്തിന്റെ പരിധിയില്‍ കൊണ്ടുവന്ന് ശിക്ഷ നടപ്പാക്കണം. ഇക്കാര്യങ്ങള്‍ ഉള്‍പ്പെടുത്തി സമഗ്രമായ ബാലഭക്ഷ്യനയം രൂപീകരിക്കണമെന്ന് കേന്ദ്ര, കേരള സര്‍ക്കാരുകളോട് ബാലഗോകുലം നാല്‍പ്പത്തി ഏഴാം സംസ്ഥാന സമ്മേളനം ആവശ്യപ്പെടുന്നു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: