ഗാന്ധിനഗര്: ഗുജറാത്തില് നിന്നും പത്ത് പാകിസ്താനി ബോട്ടുകളെയും നാല് മത്സ്യത്തൊഴിലാളികളെയും പിടികൂടി. ഇന്തോ-പാക് അതിര്ത്തിയായ കച്ചിന് സമീപം ഹരാമി നല്ല പ്രദേശത്ത് നിന്നാണ് ഇവരെ ബിഎസ്എഫ് പിടികൂടിയത്. ഇന്ത്യന് അതിര്ത്തി കടന്നതിനാലാണ് ഇവരെ പിടികൂടിയത്.
ഇന്തോ-പാക് അതിര്ത്തി പ്രദേശത്ത് പട്രോളിങ് നടത്തുന്നതിനിടെയാണ് ബിഎസ്എഫിന്റെ പ്രത്യേക സംഘം പാകിസ്താനി ബോട്ടുകളുടെ സാന്നിധ്യം തിരിച്ചറിഞ്ഞത്. ഇന്ത്യന് അതിര്ത്തി കടന്നതോടെ സുരക്ഷാ ഉദ്യോഗസ്ഥര് ഇവരെ പിടികൂടി. പ്രദേശമാകെ ബിഎസ്എഫ് വളയുകയും ചെയ്തു. പിടിച്ചെടുത്ത ബോട്ടുകളില് നിന്നോ മത്സ്യത്തൊഴിലാളികളില് നിന്നോ സംശയാസ്പദമായ ഒന്നും തന്നെ കണ്ടെടുത്തിട്ടില്ലെന്നും കൂടുതല് പാക് ബോട്ടുകള് അതിര്ത്തിയില് ഉണ്ടോയെന്ന കാര്യം പരിശോധിച്ച് വരികയാണെന്നും ബിഎസ്എഫ് അറിയിച്ചു.
