അബുജ: തെക്കുപടിഞ്ഞാറന് നൈജീരിയയില് പുരോഹിതന് തട്ടിക്കൊണ്ടുപോയി പള്ളിയില് തടവില് പാര്പ്പിച്ച എഴുപതിലധികം പേരെ പോലീസ് രക്ഷിച്ചു. നൈജീരിയയിലെ ഓന്ഡോ സ്റ്റേറ്റിലെ വാലന്റീനോ നഗരത്തിലായിരുന്നു സംഭവം.
ഏപ്രില് മാസത്തില് യേശുവിന്റെ രണ്ടാം വരവ് സംഭവിക്കുമെന്നും ആ സമയത്ത് ക്രിസ്തീയ വിശ്വാസികളെ യേശു സ്വര്ഗത്തിലെത്തിക്കുമെന്നും പറഞ്ഞ് വിശ്വസിപ്പിച്ചാണ് ഇവരെ പുരോഹിതന് തടവില് പാര്പ്പിച്ചിരുന്നതെന്ന് നൈജീരിയന് പോലീസ് വക്താവ് പറഞ്ഞതായി ബി.ബി.സിയുടെ റിപ്പോര്ട്ടില് പറയുന്നു. 23 കുട്ടികളടക്കം 77 പേരെയായിരുന്നു പുരോഹിതന് തട്ടിക്കൊണ്ടുപോയി പള്ളിയുടെ അണ്ടര്ഗ്രൗണ്ട് ഫ്ളോറില് തടവില് പാര്പ്പിച്ചത്.
ഏപ്രിലില് മാസം ഇത് സംഭവിക്കുമെന്നാണ് ആദ്യം അസിസ്റ്റന്റ് പാസ്റ്റര് പറഞ്ഞിരുന്നതെന്നും പിന്നീട് ഇത് സെപ്റ്റംബറിലേക്ക് നീട്ടിവെച്ചുവെന്നും ചില റിപ്പോര്ട്ടുകളില് പറയുന്നു. പുരോഹിതനെ പോലീസ് അറസ്റ്റ് ചെയ്തിട്ടുണ്ടെന്നും സംഭവത്തില് അന്വേഷണം ആരംഭിച്ചിട്ടുണ്ടെന്നും ഓന്ഡോ പോലീസിന്റെ പബ്ലിക് റിലേഷന്സ് ഓഫീസര് ഫുന്മിലായൊ ഒഡുന്ലമി പറഞ്ഞതായി ടി.ആര്.ടി വേള്ഡ് റിപ്പോര്ട്ട് ചെയ്യുന്നു.പെന്തകോസ്ത് ചര്ച്ചിലെ പാസ്റ്റര് ഡേവിഡ് അനിഫൊവൊഷെയും അദ്ദേഹത്തിന്റെ ഡെപ്യൂട്ടിയുമാണ് അറസ്റ്റിലായത്.
തട്ടിക്കൊണ്ടുപോയ കുട്ടികളിലൊരാളുടെ മാതാവ് പോലീസ് പരാതി നല്കിയതിനെത്തുടര്ന്നാണ് സംഭവത്തില് പോലീസ് അന്വേഷണം ആരംഭിച്ചത്. രക്ഷപ്പെടുത്തിയ കുട്ടികളെ സെക്യൂരിറ്റി ഉദ്യോഗസ്ഥര് പട്രോള് കാറില് പോലീസ് സ്റ്റേഷനില് എത്തിക്കുന്നതിന്റെ ദൃശ്യങ്ങളും സമൂഹമാധ്യമങ്ങളിലൂടെ പ്രചരിക്കുന്നുണ്ട്.
