കാഞ്ഞാണി: കൃഷിയായാലും രാഷ്ട്രീയ പ്രവർത്തനമായാലും ഗോകുൽ കരിപ്പിള്ളി എന്ന അന്തിക്കാട്ടുകാരന് ആവേശമാണ്. രണ്ടായാലും തനിക്ക് ഒരുപോലെ തിളങ്ങാനാകുമെന്നത് പ്രതിഫലിപ്പിക്കുന്നതാണ് ഇദ്ദേഹത്തിന്റെ പ്രവർത്തന മേഖലകൾ.
ഗോകുലവാസൻ ( 55 )എന്ന ഗോകുൽ കരിപ്പിള്ളി 14 വർഷം മുൻപ് മൈസൂരിലെ ബിസിനസ് അവസാനിപ്പിച്ച് നാട്ടിലെത്തിയതോടെയാണ് കൃഷിയിൽ സജീവമാകുന്നത്. കാറളത്തുള്ള തന്റെ രണ്ടരയേക്കർ സ്ഥലത്ത് നേന്ത്രവാഴ കൃഷി ചെയ്തായിരുന്നു തുടക്കം. കൃഷി വിജയം കണ്ടതോടെ നേന്ത്രനോടൊപ്പം ഞാലിപ്പൂവൻ, പൂവൻ, പാളയംകോടൻ, റോബസ്റ്റ എന്നിവയും കൃഷി ചെയ്തു. പച്ചക്കറി കൃഷിക്കായി പ്രത്യേക സ്ഥലം മാറ്റിവച്ച് അവിടെ ചീര, കുമ്പളം, മത്തങ്ങ, വെള്ളരി എന്നിവ കൃഷി ചെയ്യാനും ഗോകുൽ ശ്രദ്ധിച്ചു. കൂടാതെ എരിവു കൂടിയ ഇനം പച്ചമുളക് ( ഭ്രാന്തൻ മുളക് ) കൃഷിയും കൂടെ ചെയ്തു. കഴിഞ്ഞ വർഷം 35,000 രൂപയുടെ പച്ചമുളക് ഇവിടെ നിന്ന് വിറ്റഴിച്ചു.
തെങ്ങും കവുങ്ങും ഗോകുലിന്റെ കൃഷിയിടത്തിലുണ്ട്. ഒരു വർഷം രണ്ട് ലക്ഷത്തോളം രൂപയുടെ അടയ്ക്ക ഇവിടെ നിന്നും ലഭിക്കാറുണ്ട്. ചാണകപ്പൊടി, ആട്ടിൻകാഷ്ഠം, എല്ല് പൊടി തുടങ്ങിയവയാണ് പ്രധാനമായും വളമായി ഉപയോഗിക്കുന്നത്. വിളവെടുക്കുന്ന വസ്തുക്കൾ കാറളത്തുള്ള കാർഷിക സമിതിയുടെ കീഴിലുള്ള വിഎഫ്പിസികെ യിലെത്തിച്ചാണ് ഇപ്പോൾ വിറ്റഴിക്കുന്നത്. മുൻകാലങ്ങളിൽ കാട്ടൂരിലും പെരിങ്ങോട്ടുകരയിലുമുള്ള വ്യാപാരികൾക്ക് എത്തിച്ച് നൽകിയായിരുന്നു വിൽപ്പന. 2018 ലെ പ്രളയ സമയത്ത് 2 ലക്ഷം രൂപയുടെ കൃഷിനാശം ഇവിടെയുണ്ടായി.
രാവിലെ വീട്ടിൽ നിന്ന് കൃഷിയിടത്തിലെത്തുന്ന ഗോകുലിന് കൃഷിയിടത്തിൽ സഹായിയായിട്ടുള്ളത് കാറളം സ്വദേശി രാജനാണ്. തിരക്കുള്ള സമയത്ത് കൂടുതൽ പണിക്കാരെയും കൂട്ടും. നാളിതുവരെ നിരവധി ബഹുമതികൾ ഗോകുലിന് ലഭിച്ചു. സമ്മിശ്ര കൃഷിചെയ്തതിന്റെ മികവിന് പുരസ്കാരവും ക്യാഷ് അവാർഡും നേടിയിട്ടുണ്ട്. കാറളം കാർഷിക സമിതിയായ വിഎഫ്പിസികെ (വെജിറ്റബിൾ ആന്റ് ഫ്രൂട്ട്സ് പ്രമോഷൻ കൗൺസിൽ കേരള ) യുടെ ഈ വർഷത്തെ മികച്ച കർഷകനുള്ള അവാർഡും ഗോകുലിന് ലഭിച്ചു.
അന്തിക്കാട് ശ്രീ കാർത്യായനി ദേവീ ക്ഷേത്ര ഉപദേശക സമിതി സെക്രട്ടറിയായ ഗോകുൽ കരിപ്പിള്ളി, കൃഷിക്കൊപ്പം തന്നെ സജീവ രാഷ്ട്രീയ പ്രവർത്തകനുമാണ്. ബിജെപി നാട്ടിക മണ്ഡലം സെക്രട്ടറി കൂടിയായ ഗോകുലിന്റെ ഭാര്യ വിജയലക്ഷ്മി. മകൾ ഗ്രീഷ്മ അന്തിക്കാട് ഹൈസ്കൂളിലെ പത്താം തരം വിദ്യാർത്ഥിനിയാണ്.
