തൃശൂര്: സിറ്റി പോലീസിനു കീഴിലെ വിവിധ പോലീസ് സ്റ്റേഷനുകളില് രജിസ്റ്റര് ചെയത കേസുകളില് ഉള്പ്പെട്ട് പോലീസ് പിടിച്ചെടുത്ത മയക്കുമരുന്നുകള് നശിപ്പിക്കുന്നു. 62.229 കി.ഗ്രാം. കഞ്ചാവ്, 1865 ഗ്രാം ഹാഷിഷ് ഓയില്, 13.18 ഗ്രാം അതിമാരക സിന്തറ്റിക് ഇനത്തില് പെട്ട എംഡിഎംഎ എന്നിവയാണ് നശിപ്പിക്കുന്നത്. പുതുക്കാട് ചിറ്റിശ്ശേരി കൈലാസ് ക്ലേ കമ്പനി വക ഫര്ണസില് 24.06.2022 വെള്ളിയാഴ്ച ഇവ കത്തിച്ചു കളയും.
തൃശൂര് ടൗണ് ഈസ്റ്റ്, മണ്ണുത്തി, ഒല്ലൂര്, കുന്നംകുളം, റെയില്വേ എന്നീ പോലീസ് സ്റ്റേഷനുകളിലായി രജിസ്റ്റര് ചെയ്ത ഒന്പത് കേസുകളില് ഉള്പ്പെട്ടതാണ് ഇപ്പോള് നശിപ്പിക്കപ്പെടുന്ന കഞ്ചാവ്. ചാവക്കാട് പോലീസ് സ്റ്റേഷനിലാണ് ഹാഷിഷ് ഓയില് പിടികൂടിയത്. അതിമാരക സിന്തറ്റിക് മയക്കുമരുന്ന് എംഡിഎംഎ പിടികൂടിയത് കുന്നംകുളം പോലീസ് സ്റ്റേഷനിലാണ്. മയക്കുമരുന്ന് കേസുകളില് ഉള്പ്പെട്ട 25 പ്രതികളെ പോലീസ് അറസ്റ്റുചെയ്തു.
സിറ്റി പോലീസ് കമ്മീഷണറുടെ നേതൃത്വത്തിലുള്ള ജില്ലാ തല ഡ്രഗ് ഡിസ്പോസല് കമ്മിറ്റിയാണ് മയക്കുമരുന്നുകള് നശിപ്പിക്കുന്നതിന് അംഗീകാരം നല്കിയത്. ഇതിനു മുന്നോടിയായി പിടിച്ചെടുത്ത മയക്കുമരുന്നുകള് കെമിക്കല് ലബോറട്ടറിയില് പരിശോധന നടത്തി രാസപരിശോധന ഫലം ഉറപ്പുവരുത്തിയിരുന്നു.
