കിലുക്കാം പെട്ടി

അനീഷ് കെ.അയിലറ

കിലുങ്ങുന്നുണ്ടെന്റെ മുന്നില്‍

കിലുക്കാംപെട്ടി

ബഹുവര്‍ണ ബലൂണുകള്‍-

ക്കിടയില്‍ തട്ടി.

അതു കണ്ടിട്ടെന്റ മക-

നവയെക്കാട്ടി

കൈപിടിച്ചു ചേര്‍ന്നുനിന്നു

കാഴ്ചകള്‍ കാട്ടി.

ന്യായമൊക്കെ നിരത്തിക്കൊ-

ണ്ടെന്റെ വാപൂട്ടി

പണമില്ലാഞ്ഞിടനെഞ്ചി-

ലിടിയും വെട്ടി.

പടിഞ്ഞാട്ടു പാറിവന്ന

എരിക്കു പൊട്ടി

കടലിന്റെയപ്പുറത്തൊ-

രടുപ്പു കൂട്ടി.

അതു നോക്കാനിരുകൈയു

മിടയ്‌ക്കു കൊട്ടി-

വിളിക്കുംപോല്‍ ബലൂണുകള്‍

നിരന്നു പൊട്ടി.

പടപ്പാട്ടങ്ങോടി വന്നെ-

ന്നോര്‍മയില്‍ മുട്ടി

പഴഞ്ചന്‍ പീരങ്കി പാഞ്ഞ

പാതകള്‍ കാട്ടി.

പടിപ്പുരയ്‌ക്കപ്പുറത്തു

മതിലു കെട്ടി-

ത്തിരിച്ചപ്പോളെന്റെ വീതം

കുറഞ്ഞു കിട്ടി.

ആദ്യമൊക്കെ കൂറുകാട്ടി

യടുത്തപട്ടി

ഇണക്കങ്ങളകത്തുന്നു

വെറുപ്പും മൂട്ടി.

പൊട്ടുവാനങ്ങേറെയുണ്ട-

തൊക്കെയും കൂട്ടി

ആളടുക്കാന്‍ കിലുക്കുന്നു

കിലുക്കാം പെട്ടി.

കണ്ടു മോഹിച്ചടുക്കുന്നു-

ണ്ടങ്ങു വാലാട്ടി

കൊണ്ടു പോകുന്നുണ്ടു കൂടെ-

യമിട്ടിന്‍ പെട്ടി.

അതു കണ്ടിട്ടറമാദി-

ച്ചിരുകൈകൊട്ടി

ഉരയ്‌ക്കാനാരെടുക്കുന്നു

കുഞ്ഞു തീപ്പെട്ടി?

കത്തിയാളിപ്പടരുന്നു-

ണ്ടമിട്ടിന്‍ ചട്ടി

ആരുടെയോ നെഞ്ചകങ്ങള്‍

തകര്‍ത്തു പൊട്ടി.