തിരുവനന്തപുരം: സ്വപ്നയുടെ വെളിപ്പെടുത്തല്‍ ഗൂഢാലോചനയുടെ ഭാഗമാണെന്ന് കുറ്റപ്പെടുത്തി മുന്‍ മന്ത്രി കെ.ടി. ജലീല്‍ നല്‍കിയ കേസില്‍ സ്വപ്ന സുരേഷിനും പി.സി. ജോര്‍ജ്ജിനും എതിരെ കേസെടുത്തു.
സര്‍ക്കാറിനെ അസ്ഥിരപ്പെടുത്താനും മുഖ്യമന്ത്രിയെയും കുടുംബത്തെയും തന്നെയും അവഹേളിക്കാനും നാട്ടില്‍ കലാപം ഉണ്ടാക്കാനുമാണ് ഗൂഢാലോചന നടത്തിയെന്നാണ് പരാതിയില്‍ പറയുന്നത്.ഇതിന്റെ അടിസ്ഥാനത്തില്‍ സ്വപ്ന സൂരേഷിനും പി.സി. ജോര്‍ജ്ജിനും എതിരെ കലാപാഹ്വാനത്തിനാണ് കേസെടുത്തത്.
തന്നെ അപകീര്‍ത്തിപ്പെടുത്തിയെന്നും ഇതിന് പിന്നില്‍ പി.സി. ജോര്‍ജും സ്വപ്ന സുരേഷുമാണെന്നും ജലീല്‍ പരാതിയില്‍ പറയുന്നു. കള്ള ആരോപണങ്ങള്‍ക്കെതിരെയാണ് പരാതി നല്‍കിയതെന്ന് കെ.ടി. ജലീല്‍ പറഞ്ഞിരുന്നു. ഇതോടെ പി.സി. ജോര്‍ജും കേസില്‍ പ്രതിയാകും. കെ.ടി.ജലീന്റെ പരാതിയില്‍ 153, 120(B) എന്നീ വകുപ്പുകള്‍ പ്രകാരം കേസെടുക്കാന്‍ നേരത്തെ പൊലീസിന് നിയമോപദേശം ലഭിച്ചിരുന്നു.
മുഖ്യമന്ത്രി രാവിലെ ഡി.ജി.പിയുമായും ക്രമസമാധാന ചുമതലയുള്ള എ.ഡി.ജി.പിയുമായും ചര്‍ച്ച നടത്തിയിരുന്നു. പിന്നാലെയാണ് മുഖ്യമന്ത്രിക്കും മുഖ്യമന്ത്രിയുടെ കുടുംബത്തിനുമൊപ്പം ആരോപണം നേരിടുന്ന കെ.ടി. ജലീല്‍ കന്‍റോണ്‍മെന്‍റ് പൊലീസില്‍ പരാതി നല്‍കിയത്. സ്വപ്ന സുരേഷിനും പി.സി. ജോര്‍ജിനുമെതിരെയാണ് കെ.ടി. ജലീലിന്റെ പരാതി.
മുമ്പ് നടത്തിയ പ്രസ്താവനകള്‍ തന്നെ വീണ്ടും മസാല പുരട്ടി അവതരിപ്പിക്കുകയാണ് സ്വപ്ന ചെയ്തിരിക്കുന്നത്. ഇതിന് മുമ്പും അടിസ്ഥാനരഹിതമായ ആരോപണം സ്വപ്ന നടത്തിയിട്ടുണ്ട്. – ജലീല്‍ പരാതിയില്‍ പറയുന്നു.
പ്രതികരിക്കാൻ ഇവിടെ എഴുതുക: