തൃശ്ശൂര്: മാനസിക വൈകല്യങ്ങളെ അതിജീവിക്കാനുള്ള കരുത്ത് പകര്ന്ന് ജീവിതത്തിന് പുതിയ പ്രതീക്ഷ നല്കി ജില്ലാ മാനസികാരോഗ്യകേന്ദ്രം. താളംതെറ്റിയ മനസുമായി എത്തുന്ന അന്തേവാസികള്ക്ക് ഉപജീവനമാര്ഗം ഒരുക്കി നല്കിയാണ് മാനസികാരോഗ്യകേന്ദ്രം മാതൃകയാകുന്നത്.
ഒക്യുപ്പേഷണല് തെറാപ്പി ആന്റ് റീഹാബിലിറ്റേഷന് സൊസൈറ്റിയുടെ സഹകരണത്തോടെയാണ് അന്തേവാസികള്ക്ക്തൊഴില് പരിശീലനം നല്കുന്നത്. പേപ്പര് ബാഗ്, മെഴുകുതിരി, സോപ്പ്, സോപ്പ് പെട്ടി, സാനിറ്റൈസര്, ഫെനോയില്, ചവിട്ടി, ജ്യൂട്ട് ബാഗ്, മെഡിസിന് ബൂക്ക്, ബ്രഡ് തുടങ്ങി വിവിധ ഉല്പ്പന്നങ്ങളുടെ നിര്മ്മാണത്തിലാണ് പരിശീലനം നല്കുന്നത്. ഉല്പ്പന്നങ്ങളുടെ വിപണനത്തിനുള്ള അവസരവും സൊസൈറ്റി ഒരുക്കുന്നു.
കേന്ദ്രത്തിലെ അന്തേവാസികളെ മുഖ്യധാരയിലേക്ക് കൊണ്ടുവന്ന് ആത്മവിശ്വാസമുള്ളവരാക്കി തീര്ക്കുകയാണ് ലക്ഷ്യം. രാവിലെ 9 മുതല് ഉച്ചയ്ക്ക് 12 വരെയാണ് നിര്മ്മാണ പ്രവര്ത്തനങ്ങളില് അന്തേവാസികള് ഏര്പ്പെടുന്നത്.
സൊസൈറ്റിയുടെ നവീകരിച്ച ലഘുഭക്ഷണ ശാലയുടെയും സ്റ്റേഷനിയുടെയും ഉദ്ഘാടനം എഡിഎം റെജി പി ജോസഫ് നിര്വ്വഹിച്ചു. മാനസികാരോഗ്യ കേന്ദ്രത്തിന്റെ കോമ്പൗണ്ടിലാണ് ഭക്ഷണശാലയും സ്റ്റേഷനറിയും ഒരുക്കിയിട്ടുള്ളത്. സൂപ്രണ്ട് ടി.ആര്. രേഖ, ഒക്യുപേഷണല് തെറാപ്പിസ്റ്റ് ജോസഫ് സണ്ണി, സൊസൈറ്റി ഫോര് ഒക്യുപ്പേഷണല് തെറാപ്പി ആന്ഡ് റീഹാബിലിറ്റേഷന് പ്രസിഡന്റ് കെ. രാധാകൃഷ്ണന്, അന്തേവാസികള് തുടങ്ങിയവര് പങ്കെടുത്തു.
