കട്ടപ്പന: ട്രാന്‍സ്‌ഫോര്‍മറിലേയ്‌ക്ക് ബൈക്ക് ഇടിച്ചു കയറി അപകടം. വെള്ളായാംകുടി എസ്എംഎല്‍ പടിയില്‍ ഇന്നലെ വൈകിട്ടാണ് അപകടം ഉണ്ടായത്. അമിത വേഗത്തില്‍ എത്തിയ ഡ്യൂക്ക് ബൈക്ക് നിയന്ത്രണം നഷ്ടമായി ട്രാസ്ഫോര്‍മറിന്റെ സുരക്ഷക്കായി സ്ഥാപിച്ചിരുന്ന ഇരുമ്പ് വേലിക്ക് മുകളിലുടെ അകത്തേക്ക് ഇടിച്ചു കയറുകയായിരുന്നുവെന്ന് നാട്ടുകാര്‍ പറഞ്ഞു. ഒരാള്‍ക്ക് മുകളില്‍ പൊക്കമുള്ള ഗ്രില്ലിന് മുകളിലൂടെ ട്രാന്‍സ്‌ഫോര്‍മറിന് മുകളിലേക്ക് ബൈക്ക് പറന്ന് കയറി ഇറങ്ങിയ നിലയിലാണ്.
ബൈക്ക് ട്രാസ്ഫോര്‍മറില്‍ കുടുങ്ങിയതോടെ ഓടിച്ചയാള്‍ ബൈക്ക് ഉപേക്ഷിച്ച് പിന്നാലെ എത്തിയ കൂട്ടാളികളുടെ ബൈക്കില്‍ കയറി രക്ഷപെട്ടു. അപകടം അറിഞ്ഞയുടന്‍ കെഎസ്ഇബി അധികൃതരെത്തി വൈദ്യതി ബന്ധം വിച്ഛേദിച്ചു. നാട്ടുകാര്‍ അറിയിച്ചതനുസരിച്ച് കട്ടപ്പന പോലീസ് സ്ഥലത്തെത്തി മേല്‍ നടപടികള്‍ സ്വീകരിച്ചു. ബൈക്ക് ഓടിച്ചയാള്‍ക്ക് പരിക്കേറ്റെങ്കിലും ഇക്കാര്യം പോലീസില്‍ രാത്രി വൈകിയും അറിയിച്ചിട്ടില്ല. ബൈക്ക് പിന്നീട് ജെസിബി ഉപയോഗിച്ച് ഉയര്‍ത്തി നീക്കി സ്‌റ്റേഷനിലേക്ക് മാറ്റി. ട്രാന്‍സ്‌ഫോര്‍മറിനും നാശനഷ്ടങ്ങളുണ്ട്. ആര്‍സി ഓണറുടെ വിവരം ശേഖരം തുടര്‍നടപടി സ്വീകരിക്കുമെന്ന് കട്ടപ്പന പോലീസ് അറിയിച്ചു.
പ്രതികരിക്കാൻ ഇവിടെ എഴുതുക: