മലപ്പുറം : പെണ്‍കുട്ടികളെ പര പുരുഷന്മാര്‍ക്ക് മുന്നില്‍ പ്രദര്‍ശിപ്പിക്കരുതെന്ന് പറയുന്നത് സ്ത്രീ സംരക്ഷണത്തിനാണ്. ഹിജാബ് നിയമമുള്ളിടത്ത് പീഡനമില്ലെന്ന് സമസ്ത സെക്രട്ടറിയെ പിന്തുണച്ച് എസ്.വൈ.എസ്. സുന്നി യുവജന സംഘം. പൊതുവേദിയില്‍ വിളിച്ചു വരുത്തി പെണ്‍കുട്ടിയെ അപമാനിച്ച വിഷയത്തില്‍ സമസ്ത നേതാക്കള്‍ക്കെതിരെ വിമര്‍ശനങ്ങള്‍ ഉയര്‍ന്നതോടെയാണ് എസ്‌വൈഎസ് സുന്നി യുവജന സംഘം സംസ്ഥാന ജനറല്‍ സെക്രട്ടറി, വര്‍ക്കിങ് സെക്രട്ടറി, സെക്രട്ടറി എന്നിവര്‍ പിന്തുണച്ച് രംഗത്ത് എത്തുകയായിരുന്നു.
വിഷയത്തില്‍ മത പണ്ഡിതനെ ഒറ്റപ്പെടുത്തുന്നത് എതിര്‍ക്കും. പെണ്‍കുട്ടികളെ പര പുരുഷന്മാര്‍ക്ക് മുന്നില്‍ പ്രദര്‍ശിപ്പിക്കരുത് എന്ന് പറയുന്നത് സ്ത്രീകളുടെ സംരക്ഷണത്തിനായാണ്. ഇസ്ലാമിലെ ഹിജാബ് നിയമം സ്ത്രീ സുരക്ഷയ്‌ക്ക് വേണ്ടിയുള്ളതാണ്. അതുള്ള സ്ഥലങ്ങളില്‍ പീഡനമില്ലെന്നും എസ്‌വൈഎസ് സംസ്ഥാന ജനറല്‍ സെക്രട്ടറി പറഞ്ഞു.
അതേസമയം പെണ്‍കുട്ടിയെ വിലക്കിയ സംഭവം മതനിയമമാണെന്ന് സുന്നി യുവജനസംഘം നേതാവ് സത്താര്‍ പന്തല്ലൂര്‍ ഫെയ്സ്ബുക്കിലൂടെ പ്രതികരിച്ചു. അന്യ സ്ത്രീ പുരുഷന്‍മാര്‍ തമ്മില്‍ ഇടകലരാതിരിക്കാന്‍ പരമാവധി ശ്രദ്ധിക്കുക എന്നതാണ് മത താത്പര്യം. ആര് അപരിഷ്‌കൃതം എന്ന് വിളിച്ചാലും ഇതാണ് മത നിയമം എന്ന് അഭിമാനത്തോടെ പറയും. സമസ്ത സെക്രട്ടറി ഇതില്‍ ക്ഷമ ചോദിക്കേണ്ടതില്ലെന്നും സത്താര്‍ പന്തല്ലൂര്‍ അറിയിച്ചു.
അതിനിടെ സംഭവത്തില്‍ ബാലാവകാശ കമ്മീഷന്‍ സ്വമേധയാ കേസെടുത്തു. സമസ്ത സെക്രട്ടറി എം.ടി അബ്ദുള്ള മുസ്ലിയാരോട് കമ്മിഷന്‍ വിശദീകരണം തേടി. പെണ്‍കുട്ടിയെ അപമാനിച്ചത് ബാലാവകാശത്തിന്റെ ലംഘനമാണെന്ന് പറഞ്ഞ കമ്മിഷന്‍ പെരിന്തല്‍മണ്ണ പോലീസിനോടും ജില്ലാ ശിശുസംരക്ഷണ ഓഫീസറോടും റിപ്പോര്‍ട്ട് തേടിയിട്ടുണ്ട്.
Â
പ്രതികരിക്കാൻ ഇവിടെ എഴുതുക: