ന്യൂദല്ഹി: ഒമാന് സുല്ത്താനേറ്റിലെ വാണിജ്യ, വ്യവസായ, നിക്ഷേപ പ്രോത്സാഹന വകുപ്പ് മന്ത്രി എച്ച്.ഇ ഖായിസ് ബിന് മുഹമ്മദ് അല് യൂസഫിന്റെ നേതൃത്വത്തിലുള്ള ഉന്നതതല മള്ട്ടിസെക്ടറല് പ്രതിനിധി സംഘം 2022 മെയ് 1014 തീയതികളില് ഇന്ത്യ സന്ദര്ശിക്കും. 48 അംഗ പ്രതിനിധി സംഘത്തില് ആരോഗ്യം, ഫാര്മസ്യൂട്ടിക്കല്സ്, ഖനനം, വിനോദസഞ്ചാരം, ടെലികമ്മ്യൂണിക്കേഷന്, ഊര്ജ്ജം, ഷിപ്പിംഗ്, റിയല് എസ്റ്റേറ്റ് തുടങ്ങിയ മേഖലകളില് നിന്നുള്ള ബിസിനസ് പ്രതിനിധികളും മുതിര്ന്ന ഉദ്യോഗസ്ഥരും ഉള്പ്പെടുന്നു.
സന്ദര്ശന വേളയില്, 2022 മെയ് 11 ന് ന്യൂദല്ഹിയില് നടക്കുന്ന ഇന്ത്യ-ഒമാന് സംയുക്ത കമ്മീഷന് യോഗത്തിന്റെ (ജെസിഎം) 10ാമത് സെഷനില് ഇരുഭാഗത്തു നിന്നുമുള്ള മുതിര്ന്ന ഉദ്യോഗസ്ഥര് പങ്കെടുക്കും. വാണിജ്യ വ്യവസായ മന്ത്രി പിയുഷ് ഗോയല്, ഒമാന് മന്ത്രി എച്ച്.ഇ ഖായിസ് ബിന് മുഹമ്മദ് അല് യൂസഫ് എന്നിവര് യോഗത്തിന് അധ്യക്ഷത വഹിക്കും.
2021-2022 സാമ്പത്തിക വര്ഷത്തില് ഇരു രാജ്യങ്ങളും തമ്മിലുള്ള ഉഭയകക്ഷി വ്യാപാരം 82% വര്ധിച്ച് 9.94 ബില്യണ് യുഎസ് ഡോളറിലെത്തി നില്ക്കുന്ന ഒരു പ്രധാന സമയത്താണ് ഒമാനി പ്രതിനിധി സംഘത്തിന്റെ സന്ദര്ശനം. 2022 മെയ് 12 ന്, ഇന്ത്യഒമാന് ജോയിന്റ് ബിസിനസ് കൗണ്സിലിന്റെ (ജെബിസി) യോഗം എഫ്ഐസിസിഐ യും ഒമാന് ചേംബര് ഓഫ് കൊമേഴ്സ് ആന്ഡ് ഇന്ഡസ്ട്രിയും സംയുക്തമായി സംഘടിപ്പിക്കും.
ഇരു രാജ്യങ്ങളിലെയും മന്ത്രിമാരും യോഗത്തിന് സാക്ഷ്യം വഹിക്കും. ബി2ബി പരിപാടികള്, വ്യവസായ മേഖലകള് തമ്മിലുള്ള ആശയവിനിമയം, നിക്ഷേപക യോഗങ്ങള് തുടങ്ങി ന്യൂദല്ഹിയിലും മുംബൈയിലും ആയി മറ്റ് നിരവധി പരിപാടികള് ഒമാന് പ്രതിനിധികള്ക്കായി സംഘടിപ്പിക്കുന്നുണ്ട്.
