തിരുവനന്തപുരം : മതേതര പാരമ്പര്യം തകര്‍ക്കാന്‍ ശ്രമിച്ചാല്‍ അത് അനുവദിക്കില്ല. അത്തരക്കാര്‍ ഏത് മത രാഷ്‌ട്രീയത്തില്‍ പെട്ടവരാണെങ്കിലും അവരെ മാറ്റി നിര്‍ത്തണെന്ന് പി.സി. ജോര്‍ജിനെതിരെ വിമര്‍ശനവുമായി പാളയം ഇമാം വി.പി. സുഹൈബ് മൗലവി. വര്‍ഗ്ഗീയ പ്രസംഗം നടത്തുന്നവരെ ഒറ്റപ്പെടുത്തണമെന്നും ഇമാം ഈദ്ഗാഹിനിടെ ആവശ്യപ്പെട്ടു.
പി.സി. ജോര്‍ജ് സമൂഹത്തോട് മാപ്പ് പറയണം. മതേതരത്വം തകര്‍ത്ത് കലാപത്തിന് ശ്രമിച്ചാല്‍ നേരിടണം. കലാപ അന്തരീക്ഷം കെടുത്താന്‍ വിശ്വാസിക്ക് ഉത്തരവാദിത്തമുണ്ട്. നാടിന്റെ ഒരുമയെ തകര്‍ക്കാന്‍ ഒരു ശക്തിക്കും കഴിയില്ല. ആറ്റുകാല്‍ പൊങ്കാല കാലത്ത് പാളയം പള്ളിമുറ്റം വിട്ടുനല്‍കാറുണ്ട്. അദ്വൈതാശ്രമത്തില്‍ ഈദ് ഗാഹ് നടത്താറുണ്ട്. എല്ലാവരും നമ്മുടെ അതിഥികളാണ്. അതാണ് മതേതരത്വത്തിന്റെ സൗന്ദര്യം.
വര്‍ഗീയ പ്രചാരണങ്ങളെ അതിജീവിക്കണം. തിന്മയെ നന്മ കൊണ്ട് നേരിടണം. നിയമം ആര് കയ്യിലെടുത്താലും അത് ശരിയല്ലെന്ന് പറഞ്ഞ അദ്ദേഹം രാഷ്‌ട്രീയ കൊലപാതകങ്ങളേയും വിമര്‍ശിച്ചു. കൊലപാതകങ്ങളെ ആരും ന്യായീകരിക്കരുത്. വെട്ടിന് വെട്ടും കൊലയ്‌ക്ക് കൊലയും തുടങ്ങിയാല്‍ എവിടെച്ചെന്ന് നില്‍ക്കും. നിയമം കയ്യിലെടുത്തുന്നവര്‍ ആരായാലും അത് ശരിയല്ലെന്ന് പറയണം.
പി.സി. ജോര്‍ജ്ജിന്റേത് കേട്ടുകേള്‍വിയില്ലാത്ത പരാമര്‍ശമാണ്. അങ്ങേയറ്റം അപകടകരമായ പരാമര്‍ശമാണിത്. വിദ്വേഷം കത്തിക്കാനായിരുന്നു ശ്രമം. മുസ്ലിമിന്റെ കടയില്‍ നിന്നും സാധനങ്ങള്‍ വാങ്ങരുതെന്ന് പറയുന്നു. മുസ്ലിം ഭക്ഷണ വസ്തുക്കളില്‍ മരുന്ന് കലര്‍ത്തുന്നുവെന്ന് പ്രചരിപ്പിക്കുന്നു. കള്ളപ്രചരണമാണ് നടത്തുന്നത്. ഹിന്ദു ഹിന്ദുവിന്റെ കടയില്‍ നിന്നും മുസ്ലിം മുസ്ലിമിന്റെ കടയില്‍ നിന്നും സാധനങ്ങള്‍ വാങ്ങണമെന്ന് പറയുന്നത് കേട്ടുകേള്‍വി ഇല്ലാത്തതാണ്. പരാമര്‍ശങ്ങളില്‍ പി.സി.ജോര്‍ജ്ജ് സമൂഹത്തോട് മാപ്പ് പറയണമെന്നും പാളയം ഇമാം കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: