തിരുവനന്തപുരം : പ്രധാനമന്ത്രി നരേന്ദ്രമോദി ഗുരുവില് അടിച്ചേല്പ്പിക്കാന് ശ്രമിക്കുന്ന ഭാരതീയ സംസ്കാരവും മൂല്യവും ഹിന്ദുത്വ അജണ്ടയുടേതാണെന്ന് കോടിയേരി ബാലകൃഷ്ണന്. ശ്രീനാരായണ ഗുരുവിനെ കുറിച്ച് പ്രധാനമന്ത്രി കഴിഞ്ഞ ദിവസം നടത്തിയ പ്രസംഗത്തിനെതിരെ ദേശാഭിമാനിയിലൂടെയാണ് കോടിയേരി ഇപ്പോള് വിമര്ശനം ഉന്നയിച്ചിരിക്കുന്നത്.
മോദിയുടെ ഗുരുനിന്ദ എന്ന പേരില് പ്രസിദ്ധീകരിച്ച ലേഖനത്തില് മോദി വിശദീകരിച്ച ഗുരുദര്ശനവും കാഴ്ചപ്പാടും ഒരേസമയം കൗതുകകരവും അപകടകരവുമാണ്. ശ്രീനാരായണ ഗുരുവിനെ ആദരിക്കുന്നത് നല്ലതാണ്. എന്നാല് ആ അവസരം ഗുരുവിന്റെ ദര്ശനത്തേയും നിലപാടുകളേയും തിരസ്കരിക്കാനും സംഘപരിവാരിന്റെ കാവിവര്ണ ആശയങ്ങള് ഒളിച്ചുകടത്താനുള്ള അവസരമാക്കുന്നത് അനുചിതമാണ്.
സംഘപരിവാര് അജന്ഡ ഗുരുദര്ശനത്തിനെതിരാണ്. മോദി ഗുരുവില് അടിച്ചേല്പ്പിക്കാന് ശ്രമിക്കുന്ന ഭാരതീയ സംസ്കാരവും മൂല്യവും ഹിന്ദുത്വ അജന്ഡയുടേതാണ്. അതിന്റെ ഭാഗമായിട്ടാണ് ശ്രീനാരായണ തീര്ഥാടന കേന്ദ്രം വിശ്വാസത്തിന്റെ കേന്ദ്രം മാത്രമല്ല ‘ഏക ഭാരതം, ശ്രേഷ്ഠഭാരതം’ എന്ന ചൈതന്യമുണര്ത്തുന്ന സ്ഥാപനമാണെന്ന, പ്രത്യക്ഷത്തില് ഭംഗിവാക്കെന്ന് തോന്നിപ്പിക്കുന്ന അഭിപ്രായം മോദിയില് നിന്നുണ്ടായതെന്നും ലേഖനത്തില് പറയുന്നുണ്ട്.
