കൊച്ചി : നടനും നിര്‍മാതാവുമായ വിജയ് ബാബുവിനെ വര്‍ഷങ്ങളായി തനിക്ക് അറിയാം. തന്റെ പ്രശ്നങ്ങളില് അദ്ദേഹം രക്ഷകനെ പോലെ പെരുമാറി. അതിന്റെ മറവില്‍ വിശ്വാസം നേടിയെടുത്ത് തന്നെ വിശ്വാസം നേടിയെടുത്തതായി പരാതിക്കാരിയായ നടി. വിമെന്‍ എഗെയ്ന്‍സ്റ്റ് സെക്ഷ്വല്‍ ഹരാസ്‌മെന്റ് എന്ന ഫേസ്ബുക്ക് ഗ്രൂപ്പില്‍ നല്‍കിയ കുറിപ്പിലാണ് നടി ഇക്കാര്യം അറിയിച്ചത്. പോലീസില്‍ പരാതി നല്‍കിയത് പുറത്തുവന്നതിന് ശേഷം വിജയ് ബാബു ഫേസ്ബുക്ക് ലൈവില്‍ വരികയും യുവതിക്കെതിരായി പരാമര്‍ശം നടത്തുകയും ചെയ്തിരുന്നു.
കഴിഞ്ഞ കുറച്ച് വര്‍ഷങ്ങളായി താന്‍ മലയാള സിനിമയില്‍ ഒരു നടിയായി ജോലി ചെയ്യുന്നുണ്ട്. തന്റെ വ്യക്തിപരവും തൊഴില്‍പരവുമായ പ്രശ്നങ്ങളില് രക്ഷകനെപ്പോലെ പെരുമാറി, അതിന്റെ മറവില്‍ വിജയ് ബാബു തന്നെ ലൈംഗികമായി ചൂഷണം ചെയ്തു. തനിക്ക് ബോധമുണ്ടായപ്പോഴെല്ലാം സെക്‌സില്‍ ഏര്‍പ്പെടാനുള്ള സമ്മതം നിഷേധിച്ചു. പ്രതിഷേധം അവഗണിച്ച് കഴിഞ്ഞ ഒന്നര മാസത്തിനിടെ അയാള്‍ എന്നെ പലതവണ ബലാത്സംഗം ചെയ്തു. ഹാപ്പി പില്‍സ് പോലുള്ള രാസ ലഹരി വസ്തുക്കള്‍ കഴിക്കാന്‍ നിര്‍ബന്ധിച്ചു. മദ്യം നല്‍കി ബോധത്തോടെ Yes or No പറയാന്‍ കഴിവില്ലാതിരുന്നപ്പോള്‍ തന്റെ ശരീരത്തെ അയാളുടെ സന്തോഷത്തിനുള്ള ഉപകരണമായി ഉപയോഗിച്ചു.
അയാളില്‍ നിന്ന് ഓടിപ്പോകാന്‍ ശ്രമിക്കുമ്പോള്‍ വിവാഹ വാഗ്ദാനങ്ങളുമായി പിന്നാലെ വരും. ചലച്ചിത്രമേഖലയില്‍ അയാള്‍ക്കുള്ള സ്വാധീനവും അധികാരവും കാരണം താന്‍ അദ്ദേഹത്തിന്റെ നിയന്ത്രണത്തിലായിരുന്നു. കരിയറും സിനിമകളും പോലും അദ്ദേഹം നിയന്ത്രിച്ചു. ഒരു ദിവസം സെക്സ് നിരസിച്ചതിന് ആര്‍ത്തവത്തിലായിരുന്നപ്പോള്‍ അയാള്‍ തന്റെ വയറ്റില്‍ ബലമായി ചവിട്ടി. എന്റെ മുഖത്ത് കഫം തുപ്പുകയും സെക്‌സിനായി നിര്‍ബന്ധിക്കുകയും ചെയ്തു. എന്റെ ശാരീരിക ആരോഗ്യത്തെ പോലും പരിഗണിച്ചില്ല. എന്താണ് സംഭവിക്കുന്നതെന്ന് മനസിലാക്കാന്‍ കഴിയാത്തത്ര ആഘാതത്തിലായിരുന്നു താന്‍.
എന്നാല്‍ ഇന്ന് ബലാത്സംഗത്തിന് ഇരയായി എന്ന് മനസ്സിലാക്കുന്നു. അയാള്‍ തനിക്ക് രാക്ഷസനെപ്പോലെയായിരുന്നു. എന്റെ ഒരു നഗ്‌നവീഡിയോ റെക്കോര്‍ഡ് ചെയ്യുകയും അത് ലീക്ക് ചെയ്ത് സിനിമാ ജീവിതം തകര്‍ക്കുമെന്നും ഭീഷണിപ്പെടുത്തി.എന്റെ ജീവന്‍ അപായപ്പെടുത്തുമെന്നും. വിജയ് ബാബുവിന്റെ ഈ കെണിയില്‍ അകപ്പെട്ട ആദ്യത്തെ പെണ്‍കുട്ടി ഞാനല്ല. വേറെയും നിരവധി സ്ത്രീകള്‍ ഉണ്ടെന്ന് അറിയാന്‍ കഴിഞ്ഞു. അവര്‍ പേടിച്ച് പുറത്ത് വരുന്നില്ല എന്നു മാത്രം. ഇനി ഞാന്‍ വായ മൂടിവെക്കുന്നില്ല. നേരിട്ട ലൈംഗികവും ശാരീരികവുമായ ആക്രമണങ്ങള്‍ക്ക് നീതി ലഭിക്കുമെന്ന് വിശ്വസിക്കുന്നു. നിയമ നടപടി സ്വീകരിക്കുമെന്നും നടിയുടെ ഫേസ്ബുക്ക് കുറിപ്പില്‍ പറഞ്ഞു.
നടിയുടെ പരാതിയില്‍ വിജയ് ബാബുവിനെതിരെ കേസെടുത്തിട്ടുണ്ട്. വിജയ് ബാബു ഒളിവിലെന്ന് എറണാകുളം ഡിസിപി വി.യു. കുര്യക്കോസ് അറിയിച്ചു. ബലാത്സംഗം, ഗുരുതരമായി പരിക്കേല്‍പ്പിക്കല്‍ തുടങ്ങിയ കുറ്റങ്ങള്‍ക്കുള്ള വകുപ്പുകള്‍ ചുമത്തിയാണ് വിജയ് ബാബുവിനെതിരെ കേസെടുത്തത്. സോഷ്യല്‍ മീഡിയയിലൂടെ ഇരയുടെ പേര് വെളിപ്പെടുത്തിയതിന് ഇന്ന് തന്നെ വിജയ് ബാബുവിനെതിരെ കേസ് എടുക്കുമെന്നും അന്വേഷണം പുരോഗമിക്കുകയാണെന്നും ഡിസിപി അറിയിച്ചു.
പ്രതികരിക്കാൻ ഇവിടെ എഴുതുക: