കൊച്ചി: പാലക്കാട് ആര്‍എസ്എസ് പ്രവര്‍ത്തകന്‍ ശ്രീനിവാസനെ കൊലപ്പെടുത്താനുള്ള ആസൂത്രണത്തിന്റെ കേന്ദ്രമായി പ്രവര്‍ത്തിക്കുകയും ആയുധങ്ങള്‍ സൂക്ഷിക്കുകയും ചെയ്ത ശംഖുവാരത്തോട് മുസ്ലീം പള്ളി അടച്ചുപൂട്ടണമെന്ന് ഹിന്ദു ഐക്യവേദി സംസ്ഥാന ജനറല്‍ സെക്രട്ടറി ആര്‍.വി. ബാബു സര്‍ക്കാരിനോട് ആവശ്യപ്പെട്ടു.
മുസ്ലീം സമൂഹം ഭീകരവാദികളെ ഒറ്റപ്പെടുത്തണം. കൊലപാതകത്തിന് പള്ളി കേന്ദ്രീകരിച്ച് നടത്തിയ ഗൂഢാലോചനക്ക് നേതൃത്വം നല്‍കിയ ഇമാം സദ്ദാം ഹുസൈന്‍ അറസ്റ്റ് ചെയ്യപ്പെട്ടത് നിസ്സാരവല്‍ക്കരിക്കരുതെന്ന് അദ്ദേഹം പറഞ്ഞു. ഭീകര പ്രവര്‍ത്തനങ്ങളുടെ പേരില്‍ സ്ഥലത്തെ ഭൂരിപക്ഷം മുസ്ലീങ്ങളും പുറന്തള്ളിയപ്പോഴാണ് പോപ്പുലര്‍ ഫ്രണ്ടുകാര്‍ പുറമ്പോക്ക് ഭൂമിയില്‍ സ്വന്തം നിലക്ക് അനധികൃതമായി പള്ളി നിര്‍മിച്ചത്. നിയമവിരുദ്ധമായ ഈ നടപടി സര്‍ക്കാര്‍ കണ്ടില്ലെന്ന് നടിക്കുകയായിരുന്നു.
പാലക്കാട് സഞ്ജിത്ത് വധത്തിലും ഇബ്രാഹിം മൗലവി എന്ന ഒരു പള്ളി ഇമാം പ്രതിയാണ്. 2003 ല്‍ മാറാട് എട്ട് മത്സ്യത്തൊഴിലാളികളെ കൂട്ടക്കുരുതിക്ക് ഇരയാക്കിയ സംഭവത്തിലും കടപ്പുറത്തെ ജുമാ മസ്ജിദ് കേന്ദ്രീകരിച്ചായിരുന്നു ആസൂത്രണം നടന്നത്. അക്രമത്തിന് ഉപയോഗിച്ച ആയുധങ്ങള്‍ കണ്ടെടുത്തത് പള്ളിയില്‍ നിന്നായിരുന്നു.
പൂന്തുറ കലാപത്തിലും കേന്ദ്രമായത് പള്ളിയായിരുന്നു. ആരാധനാലയങ്ങളുടെ മറവിലും മദ്രസകള്‍ വഴിയും ഭീകരവാദം വളര്‍ത്തുന്നുണ്ട് എന്ന് മുഖ്യമന്ത്രി തന്നെ സമ്മതിച്ചതാണ്. ഓപ്പറേഷന്‍ പീജിയണ്‍ എന്ന പേരില്‍ ഇത്തരം സ്ഥാപനങ്ങളുമായി ബന്ധപ്പെട്ട് നില്‍ക്കുന്ന മുസ്ലീം യുവാക്കളെ കടുത്ത മതചിന്തയില്‍ നിന്നും പിന്‍വലിപ്പിക്കാന്‍ പോലീസിന്റെ ഇന്റലിജന്‍സ് വിഭാഗം ശ്രമിക്കുന്നുണ്ടെന്നാണ് മുഖ്യമന്ത്രി പറഞ്ഞത്. ഭീകരവാദത്തോടുള്ള പിണറായി സര്‍ക്കാരിന്റെ മൃദു സമീപനം അവസാനിപ്പിക്കണമെന്ന് ആര്‍.വി. ബാബു ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: