കോട്ടയം: അനന്തപുരി ഹിന്ദു മഹാസമ്മേളനത്തില് തങ്ങളുടെ പ്രതിനിധിയും പങ്കെടുക്കുമെന്ന് അറിയിച്ച് ക്രിസ്ത്യന് അസോസിയേഷന് ആന്ഡ് അലൈന്സ് ഫോര് സോഷ്യല് ആക്ഷന്. സമ്മേളനത്തിന്റെ ഭാഗമായി നടക്കുന്ന ഹിന്ദു യൂത്ത്കോണ്ക്ലേവിലെ സെമിനാറിലാണ് കാസാ പ്രതിനിധി പങ്കെടുക്കുക.
ഹിന്ദു ക്രിസ്ത്യന് ഐക്യം കാലഘട്ടത്തിന്റെ അനിവാര്യതയാണെന്ന് കാസാ സംസ്ഥാന പ്രസിഡന്റ് കെവിന് പീറ്റര് പറഞ്ഞു. ഇരുസമൂഹവും നേരിടുന്ന പൊതു ഭീഷണിയ്ക്കെതിരെ ഒന്നിച്ചുനില്ക്കേണ്ടത് നിലനില്പ്പിന്റെ കൂടെ പ്രശ്നമാണെന്നും. അതിനാലാണ് തങ്ങളുടെ പ്രതിനിധിയെ ഹിന്ദു സമ്മേളനത്തിന്റെ സെമിനാറില് പങ്കെടുപ്പിക്കുന്നതെന്നും അദേഹം പറഞ്ഞു.
സമ്മേളനത്തിന്റെ മൂന്നാംദിനമായ ഏപ്രില് 29ന് നടക്കുന്ന നാലാമത്തെ സെമിനാറിനാണ് കാസാ പ്രതിനിധി സംസാരിക്കുക. ലൗ, ലാന്ഡ് ജിഹാദുകളും ഹലാല് എക്കണോമിയും എന്നതാണ് സെമിനാര് വിഷയം. പ്രമുഖ അഭിഭാഷകന് കൃഷ്ണരാജും കാസാ പ്രതിനിധിയ്ക്കൊപ്പം സെമിനാര് നയിക്കും.
ഏപ്രില് 27 മുതല് മേയ് 01 വരെ തിരുവനന്തപുരം സൗത്ത്ഫോര്ട്ട് പ്രിയദര്ശിനി ക്യാമ്പസിലാണ് അനന്തപുരി ഹിന്ദു മഹാസമ്മേളനം നടക്കുക. 27 വൈകുന്നേരം 5 മണിയ്ക്ക് കേരളാ ഗവര്ണര് ആരിഫ് മുഹമ്മദ് ഖാന് സമ്മേളനം ഉദ്ഘാടനം ചെയ്യും. പ്രശസ്ത സംവിധായകന് വിവേക് അഗ്നിഹോത്രി മുഖ്യാതിഥിയായി പങ്കെടുക്കും. അഞ്ചുദിവസങ്ങളിലായി നടക്കുന്ന സമ്മേളനങ്ങളില് സ്വാമി ചിദാനന്ദപുരി, കേന്ദ്രമന്ത്രി വി.മുരളീധരന് ജെ. നന്ദകുമാര്, പി.സി ജോര്ജ്, വല്സന് തില്ലങ്കേരി, വിജി തമ്പി, ഡോ. വിക്രം സമ്പത്ത്, ഷെഫാലി വൈദ്യ, മേജര് സുരേന്ദ്ര പൂന്യ തുടങ്ങിയവര് പങ്കെടുക്കും. മേയ് ഒന്നിന് നടക്കുന്ന സമാപന സമ്മേളനം ഗോവാ ഗവര്ണര് പി.എസ് ശ്രീധരന് പിളള ഉദ്ഘാടനം ചെയ്യും.
സമ്മേളനത്തിന്റെ ഭാഗമായ ഹിന്ദുയൂത്ത് കോണ്ക്ലേവില് നാലുദിനങ്ങളിലായി 16 സെമിനാറുകള് സംഘടിപ്പിച്ചിട്ടുണ്ട്. വിവിധ വിഷയങ്ങളിലായി പ്രമുഖര് സംസാരിക്കുന്നതിന് പുറമേ പാകിസ്ഥാനില് നിന്നുള്ള ഹിന്ദുക്കളും സെമിനാറില് പങ്കെടുക്കും. ഹിന്ദു യൂത്ത്കോണ്ക്ലേവിന്റെ ലോഗോയുടെ പ്രകാശനം പ്രമുഖ സാമൂഹ്യ നിരീക്ഷകനായ ശ്രീജിത്ത് പണിക്കര് കഴിഞ്ഞ ആഴ്ച നിര്വഹിച്ചിരുന്നു.
