കൊച്ചി : നടിയെ ആക്രമിച്ച കേസില്‍ ദിലീപിനെതിരെ വളിപ്പെടുത്തലുകള്‍ നടത്തിയ ബാലചന്ദ്ര കുമാറിനെതിരെയുള്ള പീഡന പരാതിയിയില്‍ അന്വേഷണം നടക്കുന്നില്ലെന്ന് ആരോപണം. പരാതിക്കാരിയുടെ വെളിപ്പെടുത്തലില്‍ രണ്ട് മാസം കഴിഞ്ഞിട്ടും ബാലചന്ദ്ര കുമാറിനെ അറസ്റ്റ് ചെയ്യുന്നില്ലെന്നാണ് പരാതി. ഇതുമായി ബന്ധപ്പെട്ട് തിങ്കളാഴ്ച യുവതി മുഖ്യമന്ത്രിയെ നേരിട്ട് കണ്ട് പരാതി നല്‍കും.
കഴിഞ്ഞ ഫെബ്രുവരിയാണ് ബാലചന്ദ്രകുമാറിനെതിരെ യുവതി പീഡനാരോപണം ഉയര്‍ത്തിയത്. പത്തുവര്‍ഷം മുമ്പ് കൊച്ചിയിലെ സിനിമാ ഗാന രചയിതാവിന്റെ വീട്ടിലേക്ക് ജോലി വാഗ്ദാനം ചെയ്ത് വിളിച്ചു വരുത്തിയശേഷം ബലമായി പീഡിപ്പിച്ചെന്നാണ് ആരോപണം. പീഡനത്തിന്റെ ദൃശ്യങ്ങള്‍ മൊബൈലില്‍ പകര്‍ത്തിയശേഷം ഭീഷണിപ്പെടുത്തുകയും ചെയ്തിരുന്നു. അതിനാല്‍ അന്ന് വെളിപ്പെടുത്താനായില്ല. ഇപ്പോള്‍ നടിക്കായി സംവിധായകന്‍ നടത്തുന്ന വെളിപ്പെടുത്തലുകള്‍ കണ്ടപ്പോള്‍ തനിക്കുണ്ടായ ദുരനുഭവം തുറന്നു പറയാന്‍ തയ്യാറാവുകയായിരുന്നെന്നും യുവതി പറഞ്ഞു.
സംഭവത്തില്‍ കൊച്ചി സിറ്റി പോലീസ് കമ്മിഷണര്‍ക്കും ഡിജിപിക്കും പരാതി നല്‍കിയിട്ടുണ്ട്. എന്നാല്‍ മാസങ്ങള്‍ കഴിഞ്ഞിട്ടും അന്വേഷണം ഉണ്ടായിട്ടില്ല. ഇതിനെ തുടര്‍ന്നാണ് മുഖ്യമന്ത്രിയെ കണ്ട് പരാതി നല്‍കാന്‍ തീരുമാനിച്ചതെന്ന് യുവതിയുടെ അഭിഭാഷക അറിയിച്ചു.
അതേസമയം ദിലീപിനെതിരെ മൊഴി നല്‍കിയതിനെ തുടര്‍ന്ന് അദ്ദേഹം ഇടപെട്ട് മനപ്പൂര്‍വ്വം കെട്ടിച്ചമച്ച പരാതിയാണിതെന്നാണ് ബാലചന്ദ്രകുമാര്‍ പ്രതികരിച്ചത്. പ്രതികാരമായാണ് തനിക്കെതിരെ ബലാത്സംഗ കേസ് ഉയര്‍ത്തിയിരിക്കുന്നതെന്നും ആരോപണത്തില്‍ പറയുന്നുണ്ട്.
പ്രതികരിക്കാൻ ഇവിടെ എഴുതുക: