കോഴിക്കോട്: കോടഞ്ചേരിയില് തട്ടിക്കൊണ്ട് പോയ ജ്യോത്സനയെ ഒരു തവണയെങ്കിലും അവരുടെ മാതാപിതാക്കള്ക്ക് മുമ്പില് എത്തിക്കാന് സിപിഎം തയ്യാറാകണമെന്ന് ബിജെപി സംസ്ഥാന അദ്ധ്യക്ഷന് കെ.സുരേന്ദ്രന്. ജ്യോത്സനയെ വിവാഹം കഴിച്ച ഷജില് സിപിഎം പ്രവര്ത്തകനാണ്. പ്രദേശത്തെ സിപിഎം നേതൃത്വമാണ് വിഷയത്തില് ഇടപെട്ടത്. ഇപ്പോള് ഏകപക്ഷീയമായി ഷജിലിനെ പിന്തുണയ്ക്കുകയാണ്.
ബാഹ്യശക്തികളുടെ ഇടപെടല് ഉണ്ടായോ എന്ന രക്ഷിതാക്കളുടെ ആശങ്ക പരിഹരിക്കേണ്ടതാണ്. തട്ടിക്കൊണ്ട് പോയ പെണ്കുട്ടിയെ താമസിപ്പിച്ചത് എസ്ഡിപിഐ കേന്ദ്രത്തിലാണോ എന്ന സംശയമുണ്ട്. അത് അന്വേഷിക്കേണ്ടതാണ്. ഇത് സാധാരണ രീതിയിലുള്ള പ്രണയമല്ല എന്നാണ് കുടുംബം പറയുന്നത്.
സംസ്ഥാനത്ത് ഇത്തരം വിവാഹങ്ങള്ക്ക് പിന്നില് മതതീവ്രവാദ സംഘടനകളുണ്ടെന്നത് വസ്തുതയാണ്. ഇവിടെ അത് സംഭവിച്ചിട്ടുണ്ടെങ്കില് അത് അന്വേഷിക്കപ്പെടേണ്ടതാണ്. കേന്ദ്ര ഏജന്സികള് അന്വേഷിക്കണമെന്ന ജ്യോത്സനയുടെ കുടുംബത്തിന്റെ ആവശ്യത്തിന് എല്ലാ സഹായവും ബിജെപി നല്കുമെന്നും സുരേന്ദ്രന് പറഞ്ഞു.
