ന്യൂദല്‍ഹി: രാജ്യസഭയില്‍ മലയാളത്തില്‍ സംസാരിച്ച് നടന്‍ സുരേഷ് ഗോപി എംപി. കാലാവധി പൂര്‍ത്തിയാകുന്ന സുരേഷ് ഗോപിയുടെ ഈ സമ്മേളനത്തിലെ അവസാനത്തെ പ്രസംഗമാണ് മലയാളത്തില്‍ നടത്തിയത്. ആനകളെ മോശപ്പെട്ട അവസ്ഥയില്‍ ട്രെയിലറുകളിലും ട്രക്കുകളിലും കയറ്റി കൊണ്ടുപോകുന്നത് തടയാന്‍ നിയമത്തില്‍ മാറ്റം വരുത്തണമെന്നും ആനകളുടെ സുരക്ഷ ഉറപ്പാക്കണമെന്നുമാണ് സുരേഷ് ഗോപി ആവശ്യപ്പെട്ടത്.
ബഹുമാന്യനായ രാജ്യസഭാ അധ്യക്ഷന് ഒരുപാട് നന്ദി, നമസ്‌കാരം എന്നു പറഞ്ഞു കൊണ്ടാണ് സുരേഷ് ഗോപി പ്രസംഗം ആരംഭിച്ചത്. എനിക്ക് ഈ ടേമില്‍ കിട്ടുന്ന അവസാന അവസരമാണ് ഈ സീറോ ഹവര്‍ സബ്മിഷന്‍. മലയാള ഭാഷയുടെ പിതാവ് തുഞ്ചത്ത് രാമാനുജന്‍ എഴുത്തച്ഛനും കലക്കത്ത് കുഞ്ചന്‍ നമ്പ്യാര്‍ക്കും സമര്‍പ്പണമായി, അവരുടെ പാദാരവിന്ദങ്ങളില്‍ നമസ്‌ക്കരിച്ചുകൊണ്ട് മാതാപിതാക്കളുടെയും ഗുരുക്കന്മാരുടെയും നല്ലവരായ മലയാളികളുടെയും സമര്‍പ്പണമായി, ഈ നിവേദനം കേന്ദ്ര വനംവന്യജീവി വകുപ്പ് മന്ത്രിക്ക് മുമ്പില്‍ സമര്‍പ്പിക്കുന്നു.
വളര്‍ത്ത് ആനകളുടെ വാണിജ്യ വില്പന കൈമാറ്റം എന്നിവ നിരോധിച്ചുകൊണ്ട് 1972ല്‍ നിലവില്‍ വന്ന വന്യജീവി സംരക്ഷണ നിയമത്തില്‍ ഒരു ഭേദഗതി വരുത്തിയിരുന്നു. ഇതുകാരണം കേരളത്തിലെ ക്ഷേത്രങ്ങളിലും ക്രിസ്ത്യന്‍ പള്ളികളിലും മുസ്ലീം ആഘോഷങ്ങളിലുമെല്ലാം ആനകളുടെ സാന്നിധ്യം ഭീതിപ്പെടുത്തുംവിധം കുറഞ്ഞുവരികയാണ്. ഒരുപക്ഷേ ആനകളെ ചൂഷണം ചെയ്യുന്ന ഉപദ്രവിക്കുന്ന, പ്രവണത മോശപ്പെട്ട രീതിയില്‍ വളര്‍ന്നുകൊണ്ടിരിക്കുന്നു. തൃശ്ശൂര്‍ പൂരം ഉള്‍പ്പെടെയുള്ള ചടങ്ങുകളില്‍ ആനകളെ ആദരപൂര്‍വ്വം, അനുഷ്ഠാനപൂര്‍വ്വം എഴുന്നെള്ളിക്കുകയും ചെയ്യുന്നുണ്ട്.
ആനകളുടെ എണ്ണം കുറയുന്നതിന് അനുസരിച്ച് ഉള്ള സ്ഥലത്ത് നിന്നും ലോറിയിലും ട്രെയിലറുകളിലും കയറ്റി വളരെ മോശപ്പെട്ട അവസ്ഥയില്‍ കൊണ്ടുപോകുന്ന ദ്രോഹം ഒഴിവാക്കാന്‍ നിയമങ്ങളില്‍ ഗണ്യമായ മാറ്റം വരുത്തണം. മലയാളികള്‍ക്കുവേണ്ടിയും ബീഹാറിലെ സോന്‍പൂര്‍ മേള അടക്കമുള്ള വേദികള്‍ക്കുവേണ്ടിയുമാണ് ഇത് ആവശ്യപ്പെടുന്നതെന്നും സുരേഷ് ഗോപി പറഞ്ഞു.
പ്രസംഗം നിര്‍ത്തിയതിന് പിന്നാലെ അഭിനന്ദനം, വളരെ നന്നായി സംസാരിച്ചുവെന്ന് രാജ്യസഭാ അധ്യക്ഷന് വെങ്കയ്യ നായിഡു മലയാളത്തില്‍ തന്നെ മറുപടി നല്‍കുകയും ചെയ്തു.
പ്രതികരിക്കാൻ ഇവിടെ എഴുതുക: