ഗാന്ധിനഗര്(കോട്ടയം): കോട്ടയം മെഡിക്കല് കോളജിലെ രണ്ട് ലാബുകളിലും പുറത്തെ ഒരുലാബിലും നടത്തിയ രോഗിയുടെ പരിശോധനാഫലം മൂന്ന് തരത്തില്. ഇതോടെ ഏതാണ് ശരിയെന്നറിയാതെ തലപുകക്കുകയാണ് ഡോക്ടര്മാര്.
തലയോലപ്പറമ്പ് സ്വദേശിനിയായ ഇരുപത്തിയേഴുകാരി വയറുവേദനയെ തുടര്ന്നാണ് കഴിഞ്ഞ 23ന് മെഡിക്കല് കോളജ് ജനറല്സര്ജറി വിഭാഗത്തിലെത്തിയത്. ഡോക്ടറെ കണ്ടപ്പോള് സ്കാനിങിന് നിര്ദേശിച്ചു. 27ന് പരിശോധനാ ഫലവുമായി എത്തിയപ്പോള് ഗാസ്ട്രോ വിഭാഗത്തിലേക്ക് പരിശോനയ്ക്ക് അയച്ചു. പരിശോധനയില് കരള് വീക്കം കണ്ടെത്തി. തുടര്ന്ന് കരളിന്റെ ആരോഗ്യസ്ഥിതി മനസിലാക്കാന് എസ്ജിഒടി, എസ്ജിപിടി എന്നീ രണ്ടു പരിശോധനകള് നടത്താന് നിര്ദേശിച്ചു.
തുടര്ന്ന് സാമ്പിളുകള് മെഡിക്കല് കോളജിലെ പൊടിപാറ ലാബില് നല്കി. 30ന് പരിശോധനാഫലം കിട്ടിയപ്പോള് വീണ്ടും ഡോക്ടറെ കണ്ടു. ഫലം കണ്ടതോടെ ഡോക്ടര് ഞെട്ടി. ഇവിടെ നിന്ന് കിട്ടിയ പരിശോധനാഫലത്തിലെ എസ്ജിഒടി നോര്മല് റേറ്റ് 2053 എന്നാണ് രേഖപ്പെടുത്തിയിരുന്നത്. രോഗി അതീവ ഗുരുതരാവസ്ഥയില് ആയിരിക്കുമല്ലോയെന്ന് കരുതി വിവരം അന്വേഷിച്ചപ്പോഴാണ് ഡോക്ടറുടെ സമീപത്ത് നില്ക്കുന്നത് രോഗിയാണെന്ന് അറിഞ്ഞത്.
എസ്ജിഒടി, എസ്ജിപിടി നോര്മല് റേറ്റ് പല ലാബുകളിലും വ്യത്യസ്തമാണെങ്കിലും ശരാശരി നാല്പതിന് താഴെ നില്ക്കണമെന്നാണ്. എന്നാല് പൊടിപാറ ലാബില് നിന്നും ലഭിച്ചഫലം 2053, ഇതനുസരിച്ച് രോഗി ജീവിച്ചിരിക്കില്ല. അതിനാല് തന്നെ വീണ്ടും പരിശോധന നടത്താന് ഡോക്ടര് നിര്ദേശിച്ചു. തുടര്ന്ന് മെഡിക്കല് കോളജ് കോമ്പൗണ്ടില് തന്നെയുള്ള അര്ദ്ധ സര്ക്കാര് സ്ഥാപനമായ ലാബില് പരിശോധനയ്ക്ക് നല്കി. അവിടെ നിന്നും കിട്ടിയ എസ്ജിഒറ്റി ഫലം വെറും 23. കൂടുതല് കൃത്യത വരുത്താന് ഒരിക്കല്കൂടി പരിശോധന നടത്താന് ഡോക്ടര് തീരുമാനിക്കുകയും ആശുപത്രിക്ക് പുറത്തുള്ള ഒരു സ്വകാര്യ ലാബില് സാമ്പിളുകള് നല്കുകയും ചെയ്തു. അവിടെ നിന്നുള്ള എസ്ജിഒറ്റി ഫലം 18 ആയിരുന്നു. ഇതില് ഏതാണു ശരിയെന്ന് കണ്ടത്താനുള്ള തത്രപ്പാടിലാണ് ഇപ്പോള് ഡോക്ടര്മാര്.
പരിശോധനാ ഫലങ്ങള് പലതരത്തില് വന്നപ്പോള് വിവരം തിരക്കിയ ബന്ധുക്കളോട് മഞ്ഞപ്പിത്തം ഉണ്ടാകാമെന്നും വേണമെങ്കില് ഒന്നുകൂടി പരിശോധിക്കാമെന്ന മറുപടിയാണ് ലഭിച്ചത്. മെഡിക്കല് കോളജ് ലാബില്, മതിയായ യോഗ്യതയില്ലാത്തവരെ രഷ്ട്രീയ പിന്ബലത്തില് താത്ക്കാലിക നിയമനം നടത്തി കുത്തിനിറയ്ക്കുന്നതാണ് ഇതിന് കാരണമെന്നും ബന്ധുക്കള് ആരോപിക്കുന്നു.
തെറ്റായ പരിശോധനാഫലം നല്കിയ ജീവനക്കാര്ക്കെതിരെ നടപടി ആവശ്യപ്പെട്ട് ആശുപത്രി അധികൃതര്ക്ക് പരാതി നല്കുമെന്ന് രോഗിയുടെ ബന്ധുക്കള് അറിയിച്ചു. മുമ്പ് ഇവിടെ കൊവിഡ് ടെസ്റ്റിലും ഇങ്ങനെ തെറ്റായ ഫലം നല്കി ജനങ്ങള്ക്ക് ബുദ്ധിമുട്ടിലാക്കിയിട്ടുണ്ട്. എന്നാല് എന്താണ് സംഭവിച്ചതെന്ന് അറിയില്ലെന്നും അന്വേഷിച്ചശേഷം പ്രതികരിക്കാമെന്നും അധികൃതര് അറിയിച്ചു.
