ആലുവ: പെയിന്റ് കമ്പനിയിലെ ഭൂഗര്ഭ അറയ്ക്കുള്ളില് നിന്നും സ്പിരിറ്റ് സൂക്ഷിച്ച നിലയില് കണ്ടെത്തി. എടയാറിലെ വ്യവസായ മേഖലയില് പ്രവര്ത്തിക്കുന്ന പെയിന്റ് കമ്പനിയില്നിന്നും 8500 ലിറ്റര് സ്പിരിറ്റാണ് പിടികൂടിയത്. ഭൂഗര്ഭ അറയ്ക്കുള്ളില് 200ല് അധികം കന്നാസുകളിലായി സൂക്ഷിച്ച നിലയിലാണ് സ്പിരിറ്റ് കണ്ടെത്തിയത്.
പെയിന്റ് നിര്മാണത്തിന്റെ മറവിലാണ് എടയാറിലെ കമ്പനിയിലേക്ക് വ്യാപകമായി സ്പിരിറ്റ് കടത്തിയിരുന്നത്. ഗോവയില്നിന്നാണ് ഇവിടേക്ക് സ്പിരിറ്റ് എത്തിച്ചതെന്നും എക്സൈസ് കണ്ടെത്തിയിട്ടുണ്ട്. സംഭവവുമായി ബന്ധപ്പെട്ട് രണ്ട് പേരെ ഇതുവരെ കസ്റ്റഡിയില് എടുത്തിട്ടുണ്ട്. സ്ഥാപനത്തിന്റെ ഉടമയായ കലൂര് സ്വദേശി കുര്യനാണ് സ്പിരിറ്റ് കടത്തിന് പിന്നില്. ഇയാള് ഒളിവിലാണ്, ഇയാള്ക്ക് വേണ്ടി തെരച്ചില് നടത്തി വരികയാണെന്നും എക്സൈസ് അറിയിച്ചു.
നേരത്തെ എറണാകുളം, ഇടുക്കി ജില്ലകള് കേന്ദ്രീകരിച്ചുള്ള സ്പിരിറ്റ് ലോബി പ്രവര്ത്തിക്കുന്നതായി എക്സൈസ് സംഘത്തിന് സൂചന ലഭിച്ചിരുന്നു. ഇതുസംബന്ധിച്ച് അന്വേഷണം നടത്തുന്നതിനിടെയാണ് എറണാകുളത്തുനിന്ന് ഒരു വാഹനത്തില് ഇടുക്കിയിലേക്ക് സ്പിരിറ്റ് കടത്തുന്നതായി വിവരം ലഭിച്ചത്. തുടര്ന്ന് ആലുവയില്വെച്ച് ഈ വാഹനം എക്സൈസ് പിടികൂടുകയും ആയിരം ലിറ്റര് സ്പിരിറ്റ് പിടിച്ചെടുക്കുകയും ചെയ്തു. വാഹനത്തിലുണ്ടായിരുന്ന രണ്ടുപേരെ കസ്റ്റഡിയിലെടുത്ത് ചോദ്യംചെയ്തതോടെയാണ് എടയാറിലെ സ്പിരിറ്റ് ശേഖരത്തെക്കുറിച്ച് വിവരം ലഭിച്ചത്. തുടര്ന്ന് എക്സൈസ് സംഘം പെയിന്റ് കമ്പനിയിലെത്തി പരിശോധന നടത്തുകയായിരുന്നു.
ജില്ലയിലെ വിവിധ കള്ളുഷാപ്പുകളിലേക്കടക്കം ഇവിടെനിന്ന് സ്പിരിറ്റ് കടത്തിയിരുന്നതായാണ് എക്സൈസിന്റെ സംശയം. പെയിന്റ് കമ്പനിയില്നിന്ന് ചില വിദേശമദ്യ ബ്രാന്ഡുകളുടെ സ്റ്റിക്കറുകളും കണ്ടെടുത്തിട്ടുണ്ട്. സ്പിരിറ്റ് ഉപയോഗിച്ച് കമ്പനിയില് വ്യാജ മദ്യനിര്മാണം നടന്നിരുന്നതായും എക്സൈസ് സംശയിക്കുന്നു.
