കൊച്ചി: നടിയെ ആക്രമിച്ച കേസിന്റെ പേരില്‍ തന്റെ 87 വയസ്സുള്ള അമ്മയുടെ മുറിയില്‍ പോലും പൊലീസ് കയറുന്നുവെന്ന് നടന്‍ ദിലീപ്. ഹൈക്കോടതിയിലാണ് നടന്‍ ബുധനാഴ്ച ഇക്കാര്യം അറിയിച്ചത്.
പൊലീസ് വീട്ടില്‍ നിരന്തരം റെയ്ഡ് നടത്തുകയാണ്. തനിക്കെതിരെ പ്രഥമ ദൃഷ്ട്യാ തെളിവുകളില്ലെന്ന് ഹൈക്കോടതി മുന്‍കൂര്‍ ജാമ്യ ഉത്തരവില്‍ പറയുന്നു. തന്നെയും തന്റെ കുടുംബത്തെയും കൂട്ടത്തോടെ പ്രതി ആക്കിയിരിക്കുകയാണ്. കേസിന്റെ പേരില്‍ പൊലീസ് പീഢനമാണ് നടക്കുന്നതെന്നും നടന്‍ ദിലീപ് പറഞ്ഞു.
നടിയെ ആക്രമിച്ച കേസില്‍ അന്വേഷണ ഉദ്യോഗസ്ഥരെ കൊലപ്പെടുത്താന്‍ ദിലീപ് ഗൂഡാലോചന നടത്തിയെന്ന കേസിന്റെ എഫ് ഐആര്‍ റദ്ദാക്കണമെന്ന് ആവശ്യപ്പെട്ട് നടന്‍ ദിലീപ് നല്‍കിയ ഹര്‍ജി കോടതി പരിഗണിക്കവേയാണ് ദിലീപ് തന്റെ ഈ തുറന്നുപറച്ചില്‍ നടത്തിയത്. അതേ സമയം ദിലീപിനെതിരെ വധ ഗൂഢാലോചനയ്‌ക്ക് വ്യക്തമായ തെളിവുകളുണ്ടെന്ന് പ്രോസിക്യൂഷന്‍ വാദിച്ചു. സംവിധായകന്‍ ബാലചന്ദ്രകുമാര്‍ കൈമാറിയ ഓഡിയോ ക്ലിപ്പുകളും വീഡിയോയും അന്വേഷണസംഘത്തിന്റെ കയ്യിലുണ്ടെന്നും പ്രോസിക്യൂഷന്‍ വാദിച്ചു.
അതേ സമയം ഒരാള്‍ വെറുതെ പറയുന്നത് ഗൂഢാലോചന ആകുമോ എന്ന് പ്രോസിക്യൂഷനോട് കോടതി ആരാഞ്ഞു. ഗൂഢാലോചനയുടെ അടിസ്ഥാനത്തില്‍ കുറ്റകൃത്യം ചെയ്യേണ്ടേ എന്നും കോടതി ചോദിച്ചു.
പ്രതികരിക്കാൻ ഇവിടെ എഴുതുക: