തിരുവനന്തപുരം: പണിമുടക്കിന്റെ പേരില്‍ സാധാരണക്കാരെ വഴി തടയുന്ന പലര്‍ക്കും എന്തിനാണ് പണിമുടക്കെന്നോ ഹര്‍ത്തലെന്നോ അറിയില്ലെന്ന് വ്യക്തമാക്കുന്ന അടുത്ത സംഭവത്തിന്റെ വീഡിയോ കൂടി സോഷ്യല്‍മീഡിയയില്‍ വൈറലാകുന്നു. പണിമുടക്കിന്റെ രണ്ടാംദിവസം ബൈക്ക് യാത്രികനോട് ഉത്തരം മുട്ടിനില്‍ക്കുമ്പോള്‍ ഒരു ‘ഹോണ്‍’ രക്ഷിച്ച സഖാവാണ് ട്രോളുകളിലെ പുതിയ താരം.
ഹര്‍ത്താല്‍ എന്തിനുള്ളതാണെന്ന് വഴിതടയാനെത്തിയ യുവാവിനോട് യാത്രക്കാരന്റെ ചോദ്യം. അതിന് മുന്നില്‍ തന്നെ പ്രവര്‍ത്തകന്‍ ഒന്ന് പരുങ്ങി. ‘എല്ലാത്തിനും, അതുകാണ്ട് ഈ സമരത്തോട് അനുകൂലിക്കണം’ എന്ന ഒഴുക്കന്‍ മറുപടി യുവാവ് നല്‍കി. എന്തിന് വേണ്ടിയാണ് ഇന്ന് ഇത് നടത്തുന്നത് എന്ന് പറഞ്ഞുതരുമോ എന്നായി അടുത്ത ചോദ്യം. ഇതോടെ എന്തിനാണ് ഈ പണിമുടക്ക് എന്ന് വിശദീകരിക്കാന്‍ പോലും അറിയാത്ത വഴി തടയല്‍ സമരക്കാരനെ ഒരു ‘ഹോണ്‍’ രക്ഷിക്കുകയായിരുന്നു.
അതുവഴി കടന്ന് പോയ വാഹനത്തിന്റെ ഹോണ്‍ കേട്ടപാടെ ചെവിപൊത്തി ഒരു മിനിറ്റേയെന്ന് പറഞ്ഞ് ചോദ്യങ്ങളില്‍ നിന്നും യുവാവ് ഓടി രക്ഷപെട്ടു. പക്ഷേ ഇതെല്ലാം വിഡിയോ എടുത്തതോടെ ‘ഹോണ്‍ കാത്ത സഖാവ് സോഷ്യല്‍ മീഡിയയിലെ പരിഹാസ താരമായി.
പ്രതികരിക്കാൻ ഇവിടെ എഴുതുക: