കാലടി: എറണാകുളം കാലടിയിലെ ശ്രീശാരദ വിദ്യാലയത്തിന് സൈനിക സ്കൂള് പദവി നല്‍കി കേന്ദ്ര പ്രതിരോധമന്ത്രാലയം. സംസ്ഥാനത്ത് നിന്നുള്ള ഇരുനൂറോളം അപേക്ഷകരില്‍ നിന്നാണ് ശ്രീശാരദ വിദ്യാലയത്തെ തെരഞ്ഞെടുത്തത്. സൈന്യത്തിലും മറ്റ് സേവന മേഖലകളിലും സമര്‍ത്ഥരെ വാര്‍ത്തെടുക്കുന്നതിനായി രാജ്യത്തെ ഇരുപത്തിയൊന്ന് സ്‌കൂളുകള്‍ക്കാണ് കേന്ദ്രം സൈനിക സ്കൂള് പദവി നല്‍കിയത്.
തിരുവനന്തപുരം കഴക്കൂട്ടം സൈനിക സ്‌കൂളിന് പുറമെ കേരളത്തിന് മറ്റൊരു സൈനിക സ്കൂള് കൂടിയാണ് ഇതോടെ ലഭിക്കുന്നത്. മൂന്ന് പതിറ്റാണ്ട് പിന്നിടുന്ന കാലടി ശ്രീ ശാരദ വിദ്യാലയത്തിന് ഇത് അഭിമാന നിമിഷമാണ്. മെയ് മുതല്‍ സ്‌കൂളിന് സൈനിക പദവി നിലവില്‍ വരും. ആറാം ക്ലാസ് മുതലുള്ള വിദ്യാര്‍ഥികള്‍ക്ക് ഓള്‍ ഇന്ത്യ സൈനിക സ്കൂള് പ്രവേശന പരീക്ഷയിലൂടെ അഡ്മിഷന്‍ നേടാം. ശ്രീശാരദ സ്‌കൂളിലെ ആറാം ക്ലാസിലേക്ക് കടക്കുന്ന വിദ്യാര്‍ഥികളില്‍ 60 ശതമാനം പേര്‍ക്ക് പ്രത്യേക പരീക്ഷയിലൂടെ സൈനിക സ്കൂള് പാഠ്യപദ്ധതിയിലേക്ക് മാറാനും അവസരമുണ്ട്.
രാജ്യത്ത് പുതിയതായി 100 സൈനിക സ്കൂള് സ്ഥാപിക്കാനാണ് കേന്ദ്രസര്‍ക്കാര്‍ പദ്ധതി. ആദ്യഘട്ടത്തില്‍ അനുമതി കിട്ടിയ 21 സ്‌കൂളുകളില്‍ കേരളത്തില്‍ നിന്ന് ശ്രീശാരദ വിദ്യാലയത്തെ മാത്രമാണ് തെരഞ്ഞെടുത്തത്. ശൃംഗേരി മഠം നേതൃത്വം നല്‍കുന്ന ആദിശങ്കര ട്രസ്റ്റ് 1992ലാണ് ആദിശങ്കരന്റെ ജന്മനാട്ടില്‍ സ്കൂള് സ്ഥാപിച്ചത്. എല്‍കെജി മുതല്‍ പ്ലസ് ടു വരെ 1500 വിദ്യാര്‍ഥികളുണ്ട്. ഭിന്നശേഷി വിദ്യാര്‍ഥികളെ സൗജന്യമായി പഠിപ്പിക്കാനുള്ള സംവിധാനവും സ്കൂള് ഒരുക്കുന്നുണ്ട്. പ്രതിരോധ മന്ത്രാലയത്തിന്റെ നിര്‍ദേശം അനുസരിച്ച് അടിസ്ഥാന സൗകര്യങ്ങള്‍ വികസിപ്പിച്ച് രാജ്യത്തെ മികച്ച സൈനിക സ്‌കൂളായി കാലടി ശ്രീശാരദാവിദ്യാലയത്തെ മാറ്റുമെന്ന് ആദിശങ്കര മാനേജിങ് ട്രസ്റ്റി കെ. ആനന്ദ് പറഞ്ഞു.
മികച്ച അധ്യാപികയ്‌ക്കുള്ള രാഷ്‌ട്രപതി പുരസ്‌കാരവും മാനവശേഷി മന്ത്രാലയത്തിന്റെ പുരസ്‌ക്കാരവും നേടിയ ഡോ. ദീപ ചന്ദ്രനാണ് ശ്രീശാരദാവിദ്യാലയത്തിന്റെ സീനിയര്‍ പ്രിന്‍സിപ്പാള്‍.
പ്രതികരിക്കാൻ ഇവിടെ എഴുതുക: