മുംബൈ: ഐപിഎല്‍ 2022 സീസണ്‍ ഇന്ന് ആരംഭിക്കാനിരിക്കെ രാജസ്ഥാന്‍ റോയല്‍സ് ടീം വിവാദത്തില്‍. ടീം ക്യാപ്റ്റന്‍ സഞ്ജു സാംസണിന്റെ ഫോട്ടോഷോപ്പ് ചിത്രം സ്വന്തം ട്വിറ്റര്‍ പേജില്‍ സോഷ്യല്‍ മീഡിയ ടീം പോസ്റ്റ് ചെയ്തതാണ് വിവാദത്തിന് കാരണമായത്. ചിത്രം തമാശയായാണ് കണക്കാക്കിയതെങ്കിലും തന്റെ പ്രതിഷേധം സഞ്ജു പരസ്യമായി ട്വീറ്റ് ചെയ്തു. ‘സുഹൃത്തുക്കള്‍ക്ക് ഇതെല്ലാം ചെയ്യാം, കുഴപ്പമില്ല, പക്ഷേ ടീമുകള്‍ പ്രൊഫഷണലായിരിക്കണം എന്ന് രാജസ്ഥാന്‍ റോയല്‍സ് ടീമിനെ ടാഗ് ചെയ്ത് സാംസണ്‍ ട്വിറ്ററില്‍ കുറിച്ചു.
ഇത് ടീമും ക്യാപ്റ്റനും തമ്മിലുള്ള ചില തമാശകളുടെ ഭാഗമാണെന്ന് ആരാധകര്‍ കരുതിയെങ്കിലും ഫ്രാഞ്ചൈസി ട്വീറ്റ് ഡിലീറ്റ് ചെയ്തതോടെയാണ് കാര്യങ്ങള്‍ ഗുരുതരമാണെന്ന് വ്യക്തമായത്. സഞ്ജു ടീം ബസില്‍ ഇരിക്കുന്ന ഒരു ചിത്രത്തില്‍ തലപ്പാവും സണ്‍ഗ്ലാസും ഫോട്ടോഷോപ്പ് ചെയ്ത് കയറ്റി ‘ക്യാ ഖൂബ് ലഗ്‌തേ ഹോ…’ (എത്ര സുന്ദരമായിരിക്കുന്നു ) എന്ന അടിക്കുറിപ്പോടെ ചിരിക്കുന്ന ഇമോജി ഉള്‍പ്പെടെയായിരുന്നു ട്വീറ്റ്.
സഞ്ജു തന്റെ അതൃപ്തി പരസ്യമായി പ്രകടിപ്പിച്ചതിന് പിന്നാലെ ഫ്രാഞ്ചൈസി പോസ്റ്റ് നീക്കം ചെയ്തു.ഒപ്പം, ടീമിന്റെ ഡിജിറ്റല്‍ വിഷയങ്ങള്‍ കൈകാര്യം ചെയ്യാന്‍ ഒരു പുതിയ സോഷ്യല്‍ മീഡിയ ടീമിനെ ഉടന്‍ നിയമിക്കുമെന്നും സൂചിപ്പിച്ചു.’ഇന്നത്തെ സംഭവങ്ങളുടെ വെളിച്ചത്തില്‍, സോഷ്യല്‍ മീഡിയയിലെ ഞങ്ങളുടെ സമീപനത്തിലും ടീമിലും ഞങ്ങള്‍ മാറ്റങ്ങള്‍ വരുത്തുമെന്നും മാനെജ്‌മെന്റ് വ്യക്തമാക്കി.
പ്രതികരിക്കാൻ ഇവിടെ എഴുതുക: