അടിമാലി: അടിമാലി സെന്ട്രല് ജങ്ഷനിലെ കുരുക്കഴിക്കാന് നടപടി വേണമെന്ന ആവശ്യം ശക്തം. ജങ്ഷനില് ട്രാഫിക് ഐലന്ഡും സിഗ്നല് ബോര്ഡും വേണമെന്ന ആവശ്യം കാല്നൂറ്റാണ്ടായി നിലനില്ക്കുന്നതാണ്. എന്നാല് ഈ ആവശ്യത്തോട് ദേശീയ പാത അധികൃതരോ പഞ്ചായത്തോ, പോലീസോ ഒരു നടപടിയും നാളിത് വരെ സ്വീകരിച്ചിട്ടില്ല. ഇവിടെ ട്രാഫിക് ഡ്യൂട്ടിക്കായി നിയോഗിക്കപ്പെടുന്ന പോലീസുകാര് വെയിലും മഴയും ഏറ്റുകൊണ്ടാണ് ജോലി ചെയ്യുന്നത്.
കൊച്ചി-ധനുഷ്കോടി ദേശീയ പാതയും അടിമാലി-കുമളി ദേശീയപാതയും സംഗമിക്കുന്ന ഭാഗമാണ് അടിമാലി സെന്ട്രല് ജങ്ഷന്. മൂന്നാറിലേക്കുള്ള വിനോദ സഞ്ചാരികളുടെ തിരക്കും വാഹനങ്ങളുടെ എണ്ണം കൂടിയതോടെ ഇവിടെ നിന്ന് ട്രാഫിക് ഡ്യൂട്ടി നിര്വ്വഹിക്കാന് കഴിയാത്ത അവസ്ഥയായി. കൂടാതെ സിഗ്നല് ബോര്ഡിന്റെ അഭാവം സെല്ട്രല് ജങ്ഷനില് എത്തുന്ന വാഹന യാത്രികരെ കുഴക്കുകയാണ്.
ഇവിടെ ട്രാഫിക് ഐലന്ഡും സൗജന്യമായി നിര്മ്മിച്ച് നല്കുന്നതിന് ലയണ്സ് ക്ലബ്ബ് പോലുള്ള ഇന്റര്നാഷണല് സഘടനകള് താത്പര്യം പ്രകടിപ്പിച്ചിട്ടും ബന്ധപ്പെട്ട അധികാരികള് ആവശ്യമായ അനുമതി നല്കാന് തയ്യാറാകാത്തതും പ്രതിഷേധത്തിന് കാരണമായിട്ടുണ്ട്.
