കഴക്കൂട്ടം : കഴക്കൂട്ടം നാറാണത്ത് വീട്ടില്‍ സന്തോഷില്‍ ജീവന്റെ തുടിപ്പ് അവശേഷിക്കുന്നത് അഗ്‌നിരക്ഷാസേനയുടെ അവസരോചിത ഇടപെടലിലാണ്. ഇല്ലായിരുന്നുവെങ്കില്‍ കിണര്‍ വൃത്തിയാക്കുന്നതിനിടെ മണ്ണിടിഞ്ഞ് വീണ് അകപ്പെട്ട സന്തോഷ് മരണത്തിലേക്ക് വലിച്ചെറിയപ്പെട്ടേനെ.
സ്വാമിയാര്‍ മഠത്തില്‍ കുളക്കോട്ടുകോണം സുനില്‍ കുമാറിന്റെ വീട്ടിലെ 38 അടിയുള്ള കിണര്‍ വൃത്തിയാക്കുവാന്‍ ഇറങ്ങിയതായിരുന്നു സന്തോഷ്. കിണറ്റിന്റെ അടിവശത്ത് നിന്നും ആറ് തൊടിയോളം ഭാഗത്തെ മണ്ണി ഇടിഞ്ഞ് സന്തോഷിന്റെ ദേഹത്തേക്ക് വീണു. കഴുത്തോളം മണ്ണില്‍ മൂടപ്പെട്ടതിനാല്‍ സന്തോഷ് മണ്ണില്‍ പുതഞ്ഞു. മണ്ണിടിഞ്ഞ് വീണതിനാല്‍ മറ്റുള്ളവര്‍ കിണറ്റിലേക്ക് രക്ഷാപ്രവര്‍ത്തനത്തിന് ഇറങ്ങുന്നത് ഏറെ അപകടകരവും. കഴക്കൂട്ടം അഗ്‌നി രക്ഷാ നിലയത്തെ അറിയിച്ചതിനെ തുടര്‍ന്ന് സേന സംഭവസ്ഥലത്ത് എത്തി. ശ്വാസം എടുക്കാന്‍പോലും പ്രയാസപ്പെടുന്ന സന്തോഷിനെയാണ് അവര്‍ക്ക് കാണാനായത്.
ഉടന്‍ തന്നെ ഫയര്‍ ആന്‍ഡ് റെസ്‌ക്യൂ ഓഫീസര്‍ ഉമേഷ് യൂ. റ്റി മറ്റ് സേനാംഗങ്ങളുടെ സഹായത്തോടെ ട്രൈപോഡിന്റയും റോപിന്റെയും സേഫ്റ്റി ബെല്‍റ്റും ധരിച്ച് കിണറ്റിലേക്ക് ഇറങ്ങി. കിണറിന്റെ അടിഭാഗത്ത് നിന്നും അപകടകരമായ രീതിയില്‍ മണ്ണ് ഇടിഞ്ഞിട്ടുള്ളതിനാല്‍ ഏറെ അപകടകരമായ രക്ഷാ പ്രവര്‍ത്തനം. മണ്ണി നീക്കിയാല്‍ മാത്രമേ സന്തോഷിനെ രക്ഷിക്കാനാകൂ. മണ്ണ് നീക്കുന്നതിനടയില്‍ വീണ്ടും കിണറിടിയാനും സാധ്യത ഏറെ. തുടര്‍ന്ന് ഏറെ ശ്രമകരമായി മണ്‍വെട്ടി, പിക്കാസ്, ചിരട്ട, മേസ്തിരിമാര്‍ ഉപയോഗിക്കുന്ന കരണ്ടി തുടങ്ങിയ ഉപയോഗിച്ച് ഒരു മണിക്കൂര്‍ കൊണ്ട് ദേഹത്ത് കിടന്ന മണ്ണ് മാറ്റി, സന്തോഷിനെ പുറത്ത് എത്തിക്കുക ആയിരുന്നു.
ചെങ്കല്‍ ചൂള, കഴക്കൂട്ടം നിലയങ്ങളിലെ ഫയര്‍ഫോഴ്‌സ് ഉദ്യോഗസ്ഥാരാണ് രക്ഷാപ്രവര്‍ത്തനം നടത്തിയത്. സ്‌റ്റേഷന്‍ ഓഫീസര്‍മാരായ ഗോപകുമാര്‍,നിതിന്‍രാജ്, അസിസ്റ്റന്റ് സ്‌റ്റേഷന്‍ ഓഫീസര്‍മാരായ രാജേഷ് കുമാര്‍, ജി എസ് ഷാജി, ബൈജു ഫയര്‍ ആന്‍ഡ് റെസ്‌ക്യൂ ഓഫീസര്‍മാരായ ശ്രീ ഷൈന്‍ ബോസ്, രാഹുല്‍, ജിതിന്‍, സന്തോഷ്, അജേഷ്, രതീഷ്, ജീവന്‍, സജിത്ത്, ബിജു,ഷഫീഖ് ഇ , ശിവകുമാര്‍,ഷഫീഖ് ജെ സുരേഷ്, ശ്യാമളകുമാര്‍ എന്നിവര്‍ ഉണ്ടായിരുന്നു.
പ്രതികരിക്കാൻ ഇവിടെ എഴുതുക: