കൊല്ലം: നിര്മാണം പൂര്ത്തിയാക്കിയ കപ്പലണ്ടിമുക്ക്-മുനീശ്വരന് കോവില് നാലുവരി പാതയുടെ കരാര് ഏറ്റെടുത്തയാള്ക്ക് പണം നല്കാന് ഭരണസമിതി തയ്യാറാക്കണമെന്ന് കൗണ്സില് യോഗത്തില് ബിജെപി പാര്ലമെന്ററി പാര്ട്ടി ലീഡര് ടി.ജി ഗിരീഷ് ആവശ്യപ്പെട്ടു.
കോര്പ്പറേഷന് പരിധിയിലെ കുടിവെള്ളപ്രശ്നത്തിന് പരിഹാരം കാണാനുള്ള യാതൊരു ശ്രമങ്ങളും കോര്പ്പറേഷന്റെ ഭാഗത്ത് നിന്നുണ്ടാകാത്തതും യോഗത്തില് ഉന്നയിച്ചു. ഒരു മാസമായിട്ടും കുടിവെള്ളം ലഭ്യമാകാത്ത പ്രദേശങ്ങള് കോര്പ്പറേഷന് പരിധിയിലുണ്ടെന്നും ആയതിന് അടിയന്തിര പരിഹാരം കാണണമെന്നും ആവശ്യപ്പെട്ടു.
കണ്ടച്ചിറ സെന്റ് തോമസ് ദേവാലയത്തിന്റെ പുനര്നിര്മ്മാണവുമായി ബന്ധപ്പെട്ട് രണ്ടുവര്ഷമായി കോര്പ്പറേഷന് ഓഫീസുകള് കയറിയിറങ്ങിയിട്ടും എല്ലാ രേഖകളും സമയബന്ധിതമായി ഹാജരാക്കിയിട്ടും അനുമതി നല്കാത്തതിലുള്ള പ്രതിഷേധവും രേഖപ്പെടുത്തി. വിഷയത്തില് അടിയന്തിര നടപടി സ്വീകരിക്കാമെന്ന് മേയര് ഉറപ്പ് നല്കി. സ്റ്റാന്റിങ് കമ്മിറ്റി ചെയര്മാന്മാരായ ഹണി ബഞ്ചമിന്, ഉദയകുമാര്, ഗീതാകുമാരി, എന്നിവരും ചര്ച്ചയില് പങ്കെടുത്തു.
